قازاقستان قىتايدىڭ جەتەكشى ج و و- لارىنىڭ فيليالدارىن اشۋ ءۇشىن قولايلى جاعداي جاساۋعا دايىن

Хитой университети
Фото: studycn.ru

 استانا. KAZINFORM - قازاقستان قىتايدىڭ جەتەكشى تەحنيكالىق جوعارى وقۋ ورىندارىنىڭ فيليالدارىن اشۋ ءۇشىن قولايلى جاعداي جاساۋعا دايىن. بۇل تۋرالى قىتايدىڭ شينحۋا اقپارات اگەنتتىگىنە سۇحبات بەرگەن مەملەكەت باسشىسى قاسىم- جومارت توقايەۆ ايتتى.

مادەني- گۋمانيتارلىق ىنتىماقتاستىق ەلدەرىمىزدىڭ حالقى اراسىنداعى ەكىجاتقى بايلانىستار مەن دوستىقتى نىعايتۋدا ماڭىزدى ءرول اتقاراتىندىعى ءسوزسىز. ديپلوماتيالىق قارىم- قاتىناس ورناتىلعان ساتتەن باستاپ بۇل باعىت بارلىق ۋاقىتتا دا بەلسەندى بولدى. ءبىلىم بەرۋ، مادەنيەت، تۋريزم، عىلىم مەن تەحنولوگيا سىندى سالالارداعى ءوزارا ءىس- قيمىل وزگەرىسسىز جوعارى قاراي دامىپ كەلەدى. وسى جىلدىڭ ناۋرىزىندا بەيجىڭدە قازاقستاننىڭ قىتايداعى تۋريزم جىلىنىڭ اشىلۋ ءراسىمى ءوتتى. ەلدەرىمىز اراسىنداعى تۋريستىك بايلانىستاردى ىلگەرىلەتۋ باستالدى. قىتاي استاناسىندا ءراسىم قارساڭىندا تۋريزم جانە ينۆەستيتسيالار فورۋمى ءوتىپ، تۋريستىك جارمەڭكە دە ۇيىمداستىرىلدى. وندا قازاقستاننىڭ بارلىق ءوڭىرى ۇسىنىلدى. جالپى، تۋريزم جىلى اياسىندا ق ح ر- دىڭ قالالارى مەن ولكەلەرىندە ەلىمىزدىڭ قوناقجايلىعىمەن، باي مادەنيەتىمەن جانە داستۇرىمەن تانىستىرۋعا باعىتتالعان 35 تەن استام ءتۇرلى ءىس- شارا وتكىزۋ جوسپارلانعان. ءبىز قىتايمەن بىرلەسىپ، بەلگىلەنگەن قارقىندى جالعاستىرۋعا دايىنبىز»، - دەدى قازاقستان پرەزيدەنتى.

مەملەكەت باسشىسىنىڭ پايىمىنشا، قازاقستان مەن قىتايدىڭ مادەني ورتالىقتارىن ءوزارا قۇرۋ ەلدەرىمىزدىڭ اراسىنداعى گۋمانيتارلىق ىنتىماقتاستىققا قوسىمشا سەرپىن بەرەدى. سونىمەن قاتار پرەزيدەنت وسىناۋ ماڭىزدى تارتىلىس نۇكتەلەرى حالىقتارىمىزدىڭ ارسىنداعى بەرىك دوستىق كوپىرىنە اينالارىنا سەنىمدى ەكەندىگىن باسا ايتتى.

«وسى جىلدىڭ اقپانىندا د. سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتىنىڭ بازاسىندا قۇرىلعان ءبىرىنشى «لۋ بان شەبەرحاسىنا» باردىم. قازاقستاننىڭ اۆتوموبيل ونەركاسىبى ءۇشىن بىلىكتىلىگى جوعارى تەحنيكالىق جانە ينجەنەرلىك كادرلار دايىنداۋعا ارنالعان زاماناۋي زەرتحانالاردان اسەر الدىم. ءبىز ەلىمىزدە مۇنداي زەرتحانالار گەوگرافياسىن كەڭەيتۋگە بارىنشا مۇددەلىمىز. مەنىڭشە، ءبىلىم العان ماماندار بىرلەسكەن جوبالاردى ءتيىمدى جۇزەگە اسىرۋعا سەپتىگىن تيگىزەدى. جوعارى ءبىلىم سالاسىنداعى جەمىستى ىنتىماقتاستىعىمىزدىڭ تاعى ءبىر دالەلى الماتى قالاسىنداعى ءال-فارابي اتىنداعى قازاق ۇلتتىق ۋنيۆەرسيتەتىنىڭ بازاسىندا سولتۇستىك باتىس پوليتەحنيكالىق ۋنيۆەرسيتەتىنىڭ فيليالىن اشۋ بولا الادى. ءبىز ەلىمىزدە قىتايدىڭ جەتەكشى تەحنيكالىق جوعارى وقۋ ورىندارىنىڭ فيليالدارىن اشۋ ءۇشىن قولايلى جاعداي جاساۋعا دايىنبىز»، - دەدى قاسىم-جومارت توقايەۆ.

سوڭعى جاڭالىقتار