قازاقستان قىتاي، تۇركيا جانە ەۋروپا ەلدەرىنە ەت ەكسپورتتايدى - ا ش م ۆيتسە- ءمينيسترى

استانا. KAZINFORM - قازاقستان قىتاي، تۇركيا جانە ەۋروپا سەكىلدى الىپ نارىقتارعا ەت ەكسپورتتايتىن بولدى. بۇل تۋرالى ق ر اۋىل شارۋاشىلىعى ۆيتسە-ءمينيسترى ازات سۇلتانوۆ ايتتى.

«اتامەكەن» ۇ ك پ سەزدالدى جيىنى كەزىندە Kazinform تىلشىسىنە ازات سۇلتانوۆ ەت ەكسپورتتاۋ ماسەلەسىنە قاتىستى اتقارىلىپ جاتقان جۇمىستار تۋرالى ايتتى.

«ەتتى ەكسپورتتاۋ ءۇشىن ءبىز اۋەلى ىشكى نارىقتى قامتاماسىز ەتۋىمىز كەرەك. سودان ارتىلعانىن ءبىز ەكسپورتقا شىعارامىز. ءبىزدىڭ ەلىمىزدىڭ شارۋالارى ىشكى نارىقتى 96-100 پايىز كولەمىندە قامتي الادى. قازىر ەكسپورتقا جاقىن تۇرمىز. بيىل رەسەيگە سيىر ەتىن ەكسپورتتاۋعا جول اشىلدى. ودان بولەك، ەۋروپامەن كەلىسىمشارت دايىن. ول جاققا جىلقى ەتىن جەتكىزەمىز. سونداي-اق، اۋىل شارۋاشىلىعى ءمينيسترى تۇركياعا بارىپ، كەلىسىم جاساسىپ كەلدى. ەندى بىزگە تۇركيا نارىعى دا اشىلىپ وتىر. قازىر تۇركىستان وبلىسىنداعى مال بورداقىلاۋمەن اينالىساتىن «قايىپ اتا» شارۋا قوجالىعى تۇركياعا سيىر ەتىن ەكسپورتتاۋ بويىنشا بەلسەندى جۇمىس جۇرگىزىپ جاتىر»، - دەدى ۆيتسە- مينيستر.

سپيكەردىڭ ايتۋىنشا، ەلىمىز بۇرىن قىتايعا تەك مۇزداتىلعان ەت ەكسپورتتاعان. ەندىگى جەردە جاڭا سويىلعان مال ەتىن ۇشامەن دە جەتكىزۋ مۇمكىن بولادى.

«قىتايعا سيىر، جىلقى جانە تاۋىق ەتىن جەتكىزۋ كەلىسىمشارتىنا قول قويدىق. ول بۇرىن بولماعان»، - دەدى ازات سۇلتانوۆ.

سونداي- اق سپيكەر تۇركيا نارىعى ءبىزدىڭ ەلىمىزدەن ەت اسىرۋعا 20  جىلداي جابىق بولعانىن ايتتى.

«ۆەتەرينارلىق كەلىسىم بولعان جوق. سوسىن، تۇركيا دا، قىتاي دا يمپورتتايتىن تاۋارلارعا قيىن تالاپتار قويادى. ەندى ولاردىڭ تالاپتارىن ءبىز تۇگەل ورىندادىق. كەلىسىمشارتتار جاسالدى. مينيستر تۇركياعا ىسساپارمەن بارعاندا ەلىمىزدىڭ ءبىرقاتار كومپانيالارىنىڭ وكىلدەرى بىرگە بارعان بولاتىن. سولاردىڭ ىشىندە جوعارىدا اتاپ وتكەن «قايىپ اتا» شارۋا قوجالىعىنىڭ باسشىسى سىرىم ەرتايەۆ تا بولدى»، - دەدى اشم باسشىسىنىڭ ورىنباسارى.

ايتا كەتەيىك، بۇعان دەيىن ازات سۇلتانوۆ ەلىمىزدىڭ بازارلارىندا يمپورتتالعان ەت ساتىلمايتىنىن ايتقان بولاتىن.