قازاقستان-قىتاي قارىم-قاتىناسى دامۋدىڭ جاڭا التىن كەزەڭىنە ءوتتى - توقايەۆ

шағын құрамдағы келіссөз
Фото: akorda.kz

استانا. KAZINFORM - قازاقستان- قىتاي قارىم-قاتىناسى دامۋدىڭ جاڭا التىن كەزەڭىنە ءوتتى.

بۇل تۋرالى اقوردادا ەلىمىزگە مەملەكەتتىك ساپارمەن كەلگەن قىتاي حالىق رەسپۋبليكاسىنىڭ ءتوراعاسى شي جينپيڭمەن كەڭەيتىلگەن قۇرامداعى كەلىسسوز بارىسىندا مەملەكەت باسشىسى قاسىم- جومارت توقايەۆ ايتتى.

«سىزبەن ەلوردامىز - استانادا جۇزدەسىپ وتىرعانىمىزعا وتە قۋانىشتىمىن. ءسىز بۇگىن ەلىمىزگە مەملەكەتتىك ساپارمەن كەلىپ وتىرسىز. زور ريزاشىلىعىمدى بىلدىرەمىن. بۇل ەڭ الدىمەن قازاقستان- قىتاي ماڭگىلىك جان-جاقتى ستراتەگيالىق ارىپتەستىگىن ودان ارى نىعايتۋعا دەگەن ۇمىتىلىستىڭ ايقىن كورىنىسى دەپ باعالايمىن. قازاقستان ەلدەرىمىز اراسىنداعى تاتۋ كورشىلىك پەن عاسىرلار بويعى دوستىقتىقتى نىعايتۋعا ەرەكشە ءمان بەرەدى. ءبىز بىرلەسكەن كۇش-جىگەرىمىزدىڭ ارقاسىندا وزگەلەرگە ۇلگى بولاتىن جانە ءتۇرلى باعىتتى قامتيتىن مەملەكەتارالىق ىقپالداستىق ورناتتىق. ءبىزدىڭ ەكىجاقتى قارىم-قاتىناسىمىز دامۋدىڭ جاڭا التىن كەزەڭىنە ءوتتى دەپ ايتۋعا بولادى»، - دەدى قازاقستان پرەزيدەنتى.

مەملەكەت باسشىسى ەكى ەل اراسىنداعى بايلانىستار تۇراقتى الەۋمەتتىك، ەكونوميكالىق دامۋعا، حالىقتارىمىزدىڭ ءال- اۋقاتىن جاقسارتۋعا زور سەپتىگىن تيگىزىپ وتىرعانىن باسا ايتتى.

«بىلتىر ءوزارا تاۋار اينالىمى 41 ميلليارد دوللاردان استى. بۇل -رەكوردتىق كورسەتكىش. قازىرگى تاڭدا 45 ورتاق ينۆەستيتسيالىق جوبا جۇزەگە اسىرىلىپ جاتىر. ونىڭ جالپى قۇنى - 14,5 ميلليارد دوللار. جوبالار ونەركاسىپ، ەنەرگەتيكا، كولىك، ترانزيت، جاسىل ەكونوميكا، اۋىل شارۋاشىلىعى جانە باسقا دا سالالاردى قامتيدى. سونىمەن بىرگە ەكى ەلدىڭ مادەني- گۋمانيتارلىق بايلانىستارى جاندانا ءتۇستى. جوعارى مارتەبەلى ءتوراعا! وسى جەتىستىكتەردىڭ ءبارى ءسىزدىڭ جەكە قولداۋىڭىزدىڭ ارقاسىندا تابىستى جۇزەگە اسقانىن ايرىقشا اتاپ وتكىم كەلەدى»، - دەدى قاسىم-جومارت توقايەۆ.

سوڭعى جاڭالىقتار