«قازاقستان-قىتاي» فورۋمىندا $629 ميلليونعا ىنتىماقتاستىق تۋرالى كەلىسىمگە قول قويىلدى
استانا. KAZINFORM - ق ر پرەمەر-ءمينيسترىنىڭ ورىنباسارى سەرىك جۇمانعارين 26-ماۋسىمدا ءۇرىمجى قالاسىندا (ش ۇ ا ا، ق ح ر) وتكەن «قازاقستان-قىتاي» III ايماقارالىق فورۋمىنا قاتىستى.
ءىس-شارادا $629 ميلليونعا ىنتىماقتاستىق تۋرالى ءبىرقاتار قۇجاتقا قول قويىلدى.
وسى ءىرى ديالوگ الاڭىندا قازاقستان مەن قىتاي وڭىرلەرى اراسىنداعى ساۋدا-ەكونوميكالىق، كولىك، ينۆەستيتسيالىق جانە مادەني-گۋمانيتارلىق ىنتىماقتاستىقتىڭ وزەكتى ماسەلەلەرى تالقىلانادى. فورۋمعا قازاقستاننىڭ 17 وبلىسىنىڭ، ءىرى كومپانيالارى مەن ىسكەر توپتارىنىڭ جانە ق ح ر- دىڭ 27 ءوڭىرىنىڭ وكىلدەرى قاتىستى.
سەرىك جۇمانعارين ءىس- شارانىڭ اشىلۋىندا قىتاي قازاقستانعا ينۆەستيتسيا سالۋ كولەمى بويىنشا ءتورتىنشى ورىندا تۇرعانىن ايتتى.
«قازاقستان مەن قىتاي اراسىندا قارقىندى ايماقارالىق ءوزارا ءىس-قيمىل جاساۋعا بارلىق جاعداي جاسالعان. سونىمەن بىرگە ينۆەستيتسيالىق ىنتىماقتاستىقتىڭ جاڭا مۇمكىندىكتەرى ءۇشىن ۇلكەن الەۋەت بار»، - دەدى ۆيتسە-پرەمەر.
فورۋم اياسىندا $629,1 ميلليونعا 17 قۇجاتقا قول قويىلدى. ولاردىڭ ىشىندەگى ەڭ ىرىلەرى: الماتى وبلىسى مەن «TBEA» ا ا ق اراسىندا 10 قوسالقى ستانسا مەن ەلەكتر جەتكىزۋ جەلىلەرىن سالۋ جانە جاڭارتۋ، ەلەكتر جابدىقتارىن ءوندىرۋ زاۋىتىن سالۋ تۋرالى كەلىسىمدەر، كۇنباعىس مايىن جەتكىزۋ بويىنشا ءۇش كەلىسىمشارت، «Qazaq Camel» ج ش س مەن Xinjang Huaken Dairy Group Co ltd اراسىندا قۇرعاق تۇيە ءسۇتىن جەتكىزۋ تۋرالى كەلىسىمشارتتار جانە باسقالارى بار.
سول كۇنى ۇرىمجىدە «ەكسپو قىتاي-ەۋرازيا» حالىقارالىق كورمەسى ءوز جۇمىسىن باستادى. بۇل نارىققا باعىتتالعان سەگىزىنشى كاسىبي برەند كورمەسى. ونىڭ اشىلۋىنا وزبەكستان مەن قىرعىزستان ۇكىمەتتەرىنىڭ باسشىلارى، قازاقستان مەن تاجىكستان پرەمەر-مينيسترلەرىنىڭ ورىنباسارلارى قاتىستى.
سەرىك جۇمانعارين كورمەنىڭ اشىلۋىنداعى العى سوزىندە قىتاي مەن قازاقستان اراسىنداعى قارىم-قاتىناستاردىڭ «التىن 30 جىلدىعىنىڭ» جاڭا پاراعى جاڭا امبيتسيالىق ماقساتتار قويىپ وتىرعانىن اتاپ ءوتتى. ولاردىڭ ءبىرى - ءوزارا تاۋار اينالىمىن $100 ميللياردقا دەيىن جەتكىزۋ.
260 شارشى مەترلىك قازاقستاندىق پاۆيلون «ەكسپو قىتاي-ەۋرازيا» كورمەسىندە قوناقتار پاۆيلوندارى اراسىنداعى ەڭ ءىرىسى بولدى. مۇندا 42 وتاندىق كومپانيانىڭ ەكسپورتتىق تاۋارلارى ورنالاستىرىلعان. ءبىزدىڭ ەلىمىز نەگىزىنەن ازىق-تۇلىك ونىمدەرىن ۇسىندى. قازاقستاندىق پاۆيلوننىڭ ۇيىمداستىرۋشىسى Qaztrade ساۋدا ساياساتىن دامىتۋ ورتالىعى بولدى.
انىقتاما: «ەكسپو قىتاي - ەۋرازيا» كورمەسى 2024-جىلعى 26-30-ماۋسىم ارالىعىندا ش ۇ ا ا- نىڭ ءۇرىمجى قالاسىندا وتەدى. ونى قىتايدىڭ ساۋدا مينيسترلىگى مەن سىرتقى ىستەر مينيسترلىگى، حالىقارالىق ساۋدانى دامىتۋعا جاردەمدەسۋ كوميتەتى جانە شىڭجاڭ - ۇيعىر اۆتونوميالىق اۋدانىنىڭ حالىق ۇكىمەتى بىرلەسىپ ۇيىمداستىرادى. ءىس-شارانىڭ جالپى كورمە الاڭى 140000 شارشى مەتردى قۇرايدى. وعان 50 ەلدەن، ايماقتاردان جانە حالىقارالىق ۇيىمداردان، 30 پروۆينتسيادان، اۆتونومدى اۋدانداردان جانە ق ح ر مۋنيتسيپاليتەتتەرىنەن 1900 كومپانيا مەن ۇيىم قاتىسادى.
