قازاقستان قىسقى ازيا ويىندارى تاريحىندا 200 گە جۋىق مەدال جەڭىپ العان
استانا. KAZINFORM - قىتايدىڭ حاربين قالاسىندا وتەتىن IX قىسقى ازيا ويىندارىنىڭ باستالۋىنا 30 كۇن قالدى. وسى ورايدا، Kazinform ءتىلشىسى ەلىمىزدىڭ اق ازيادا تاريحىنا شولۋ جاساپ شىقتى.
قىسقى ازيا ويىندارى - ازيا ەلدەرىنىڭ قاتىسۋىمەن ءتورت جىلدا ءبىر وتەتىن قىسقى سپورتتىق دودا. جاپونيانىڭ وليمپيادا كوميتەتى 1982-جىلى ازيا ويىندارىنىڭ قىسقى نۇسقاسىن ۇيىمداستىرۋدى ۇسىنىپ، العاشقى ەكى كەزەكتى اق ازيادانى 1986 جانە 1990-جىلى ساپپورو قالاسىندا وتكىزدى. العاشقى ويىندارعا بار-جوعى 7 ەلدىڭ وكىلى قاتىسسا دا، كەيىننەن ولاردىڭ سانى ارتىپ، 2007-جىلعى ويىنداردا ازيا وليمپيادالىق كەڭەسىنە مۇشە 45 مەملەكەتتىڭ 27 ءسى قاتىستى.
قازىرگى ۋاقىتقا دەيىن، قىسقى ازيا ويىندارى 8 مارتە ءساتتى ءوتتى. ويىندار جاپونيادا 4 رەت، قىتايدا 2 مارتە جانە كورەيا مەن قازاقستاندا ءبىر-ءبىر رەت جالاۋىن جەلبىرەتتى.
وسى وتكەن 8 اق ازيادادا 10 ەلدىڭ وكىلى مەدال يەلەندى. قىسقى سپورت تۇرلەرىنەن مىقتى سانالاتىن جاپونيا، قىتاي، قازاقستان جانە وڭتۇستىك كورەيادان باسقا، موڭعوليا، يران، قىرعىزستان، ليۆان، وزبەكستان جانە ك ح د ر سپورتشىلارى دا جۇلدەگەرلەر قاتارىنان كورىنگەن.
قازاقستان 1996-جىلدان بەرى ازيانىڭ باستى قىسقى سپورت دوداسىندا ونەر كورسەتىپ كەلەدى. ەل قۇراماسى وتكەن 6 كەزەكتى اق ازيادادا جالپى 196 مەدال (78 التىن، 62 كۇمىس، 56 قولا) يەلەنىپ، جاپونيا مەن قىتايدان كەيىن ءۇشىنشى ورىندا.
حاربين قىسقى ازيا ويىندارى
3-قىسقى ازيا ويىندارى قىتايدىڭ حاربين قالاسىندا 1996-جىلى اقپان ايىندا ءوتتى. قازاقستان تاۋەلسىز ەل رەتىندە العاش رەت قاتىسىپ، 17 ەل اراسىنان سۋىرىلىپ العا شىقتى.
حاربيندە وتانداستارىمىز 14 التىن، 9 كۇمىس، 8 قولا مەدالمەن جالپى ەسەپتە جارىس قوجايىندارىنان كەيىن ەكىنشى ورىنعا جايعاستى. ليۋدميلا پروكاشيەۆا (كونكيمەن جۇگىرۋ)، پاۆەل ريابينين (شاڭعى)، دميتري پانتوۆ، ۆالەري يۆانوۆ جانە يننا شەشكيل (بياتلون) بىرنەشە رەت جەڭىس تۇعىرىنا كوتەرىلدى.
كانۆوندو قىسقى ازيا ويىندارى
1999-جىلعى كانۆوندودا وتكەن (وڭتۇستىك كورەيا) ازيا ويىندارىندا قازاقستان قۇراماسى 10 التىن، 8 كۇمىس جانە 7 قولا مەدال جەڭىپ، جالپى ەسەپتە ءۇشىنشى ورىننان كورىندى.
ەل قۇراماسى ۆلاديمير سميرنوۆتىڭ جەتەكشىلىگىمەن، 5 التىن مەدال يەلەندى.
اوموري قىسقى ازيا ويىندارى
5-قىسقى ازيا ويىندارى جاپونيانىڭ اوموري قالاسىندا ءوتتى. ناتيجەسىندە، قازاقستاندىق سپورتشىلار 7 التىن، 7 كۇمىس جانە 6 قولا مەدالعا يە بولىپ، جالپى ەسەپتە ءتورتىنشى ورىنعا سىرعىدى.
جاپونيادا شاڭعىشىشىلارىمىز تاعى ەرلىك كورسەتىپ، قار سپورتىنىڭ 7 ءتۇرلى ديستسيپلينادان 6 التىن مەدال جەڭىپ الدى. سونداي-اق، فريستايل موگۋلدان يرينا كورمىشيەۆا كۇمىس، يۆان سيدوروۆ قولا يەلەندى. بياتلوننان ايەلدەر ەستافەتاسىندا قازاقستان قۇراماسى مارەگە ءۇشىنشى بولىپ جەتتى.
چاڭچۋن قىسقى ازيا ويىندارى
2007-جىلعى قىتايدىڭ چاڭچۋن قالاسىندا وتكەن اق ازيادادا قازاقستان بارلىعى 6 التىن، 6 كۇمىس جانە 6 قولا مەدال جەڭىپ الىپ، جالپى ەسەپتە ءتورتىنشى ورىندى قاناعات تۇتتى.
بۇل جولى قازاقستان قۇراماسى شاڭعى جارىستارى مەن بياتلوننان ءساتتى ونەر كورسەتتى.
الماتى-استانا قىسقى ازيا ويىندارى
2011-جىلى قازاقستان ءوز تاريحىندا العاش رەت قىسقى ازيا ويىندارىن قابىلدادى. 7-قىسقى ازيا ويىندارى الماتى جانە استانا قالالارىندا ءساتتى ءوتىپ، ازيانىڭ 26 ەلىنەن كەلگەن سپورتشىلار قىسقى سپورتتىڭ 11 تۇرىنەن 69 مەدال جيىنتىعىن ساراپقا سالدى.
ايتا كەتەرلىگى، 7-قىسقى ازيادا ويىندارىنا باحرەين، كاتار جانە سينگاپۋر ءبىرىنشى رەت قاتىستى.
قازاقستاندىق سپورتشىلار ءوز ەلىمىزدە 32 التىن، 21 كۇمىس جانە 17 قولا مەدال يەلەنىپ، جالپى ەسەپتە كوش باستادى.
ساپپورو قىسقى ازيا ويىندارى
2017-جىلى ساپپورو قالاسى اق ازيادانى ءۇشىنشى مارتە قابىلدادى. 8-قىسقى ازيا ويىندارى باستاپقىدا 2015-جىلعا جوسپارلانعان. الايدا، 2009-جىلعى 3-شىلدەدە سينگاپۋردە وتكەن ازيا وليمپيادالىق كەڭەسىنىڭ (ا و ك) باس اسسامبلەياسى ونى قىسقى وليمپيادا ويىندارى قارساڭىنداعى جىلعا اۋىستىرۋعا شەشىم قابىلدادى.
قازاقستان دەلەگاتسياسى وسى ويىندارعا كەيبىر سپورت تۇرلەرى بويىنشا ەكىنشى قۇراممەن بارادى. ونىڭ سەبەبى، ءبىزدىڭ كوشباسشىلارىمىزدا بۇل ۋاقىتتا ءبىرقاتار سپورت تۇرىنەن الەم چەمپيوناتى، الەم كۋبوگىنىڭ كەزەڭدەرى وتەدى. كەيبىر وزا شاباتىن سپورتشىلارىمىز 28-دۇنيەجۇزىلىك قىسقى ۋنيۆەرسيادادان (الماتى قالاسى، 29-قاڭتار – 8-اقپان) كەيىن از ۋاقىت ىشىندە سپورتتىق بابىنا كەلىپ، تولىققاندى دايىندىققا كىرىسە المايدى.
سوعان قاراماستان وتاندىق بياتلونشىلار ەڭ كوپ التىن مەدال ۇتىپ الدى. قورىتىندى بويىنشا، ەل قۇراماسى بارلىعى 9 التىن، 11 كۇمىس جانە 12 قولا مەدال جەڭىپ الىپ، جالپى ەسەپتە ءتورتىنشى بولدى.
ەسكە سالساق، IX قىسقى ازيا ويىندارى 2025-جىلدىڭ 7-14-اقپانى ارالىعىندا قىتاي حالىق رەسپۋبليكاسى حەيلۋنتسزيان پروۆينتسياسىنىڭ حاربين قالاسىندا وتەدى. سپورتشىلار 12 سپورت ءتۇرى بويىنشا 64 مەدال جيىنتىعىن ساراپقا سالادى.
بۇعان دەيىن حابارلاعانىمىزداي، ءدۇبىرلى دودا تاريحتا ەڭ كوپ ەل قاتىسقان قىسقى ازيادانىڭ ءبىرى بولماق.
سونداي-اق، كامبودجا مەن ساۋد ارابياسى قىسقى ازيا ويىندارىنا العاش رەت قاتىسقالى وتىر.
ق ر تۋريزم جانە سپورت مينيسترلىگىنىڭ حابارلاۋىنشا، قازاقستاننان 139 سپورتشى ەل نامىسىن قورعايدى.
وسىعان دەيىن اق ازيادانىڭ حاربين قالاسىنداعى مۇز سپورتى وتەتىن 5 ارەنا جانە يابۋلي تاۋ شاڭعىسى كۋرورتىندا قار سپورتى وتەتىن 8 جارىس الاڭىندا وتەتىنىن جازعان ەدىك.
اۆتور مۇحتار قاليموللا ۇلى
