قازاقستان قۇراماسىن IX قىسقى ازيا ويىندارىنا شىعارىپ سالۋ ءراسىمى ءوتتى
استانا. KAZINFORM - ەلورداداعى Qazaqstan جەڭىل اتلەتيكا سپورت كەشەنىندە IX قىسقى ازيا ويىندارىنا قازاقستان ۇلتتىق قۇراماسىنىڭ سپورتشىلارىن سالتاناتتى شىعارىپ سالۋ ءراسىمى ءوتتى.

ق ر تۋريزم جانە سپورت مينيسترلىگى باسپا ءسوز قىزمەتىنىڭ مالىمەتىنشە، سارى قۇرلىق باسەكەسى 7-14-اقپان كۇندەرى قىتاي حالىق رەسپۋبليكاسىنىڭ حاربين جانە يابۋلي قالالارىندا وتەدى.
سالتاناتتى جيىنعا ق ر تۋريزم جانە سپورت ءمينيسترى ەربول مىرزابوسىنوۆ، ۇلتتىق وليمپيادا كوميتەتىنىڭ وكىلدەرى، 1998-جىلعى قىسقى وليمپيادا ويىندارىنىڭ جۇلدەگەرى، 1996-جىلعى قىسقى ازيا ويىندارىنىڭ ەكى دۇركىن چەمپيونى ليۋدميلا پروكاشيەۆا، شورت-ترەكتەن ق ر ەڭبەك سىڭىرگەن جاتتىقتىرۋشىسى ءمادىعالي قارسىبەكوۆ، سپورت ارداگەرلەرى، جاتتىقتىرۋشىلار مەن قوعام وكىلدەرى قاتىستى.

ءىس-شارا بارىسىندا IX قىسقى ازيا ويىندارىنىڭ اشىلۋ راسىمىندە تۋ ۇستايتىن سپورتشىلارعا قازاقستان رەسپۋبليكاسىنىڭ تۋى سالتاناتتى تۇردە تاپسىرىلدى. حاربيندەگى ويىنداردىڭ اشىلۋ سالتاناتىندا ەلىمىزدىڭ بايراعىن حوككەيدەن ق ر سپورت شەبەرى ءادىل بەكەتايەۆ پەن شورت-ترەكتەن حالىقارالىق دارەجەدەگى سپورت شەبەرى ولگا تيحونوۆا الىپ شىعادى. ءوز كەزەگىندە ءادىل بەكەتايەۆ تۋ ۇستاۋشى رەتىندە كوپشىلىكتىڭ الدىنا شىعىپ، سالتاناتتى تۇردە انت بەردى.
قازاقستان قۇراماسىنان ويىندارعا 137 سپورتشى قاتىسادى. ولار 6 سپورت تۇرىنەن 10 ديستسيپلينادا (كونكيمەن جۇگىرۋ سپورتى، شورت-ترەك، مانەرلەپ سىرعاناۋ، بياتلون، كەرلينگ، شاڭعى جارىستارى، تاۋ شاڭعىسى، فريستايل، سكي-الپينيزم، شايبالى حوككەي) ونەر كورسەتەدى. ۇلتتىق كوماندا 51 مەدال جيىنتىعىنا تالاسادى.

ەربول مىرزابوسىنوۆ سپورتشىلارعا ساتتىلىك تىلەپ، سارى قۇرلىق باسەكەسىنىڭ ەلىمىز ءۇشىن ماڭىزدى دودا ەكەنىن اتاپ ءوتتى.
- IX قىسقى ازيا ويىندارىنىڭ باستالۋىنا ساناۋلى كۇندەر قالدى. قازاقستان ۇلتتىق قۇراماسى قىسقى ازيا ويىندارىنا تولىق دايىن. وعان قاجەتتى بارلىق جاعداي جاسالدى. ويىندارعا ساپالى دايىندالۋ ءۇشىن ۇلتتىق قۇراما 137 وقۋ-جاتتىعۋ جيىنىن وتكىزدى. سپورتشىلارىمىز 86 حالىقارالىق جارىستا ونەر كورسەتىپ، 33 مەدال جەڭىپ الدى. جالپى، ەلىمىزدە قىسقى سپورت تۇرلەرىندە جەڭىستەرمەن ورىلگەن جاقسى ءداستۇر بار. بۇگىندە تەك ەلىمىزگە عانا ەمەس، بۇكىل الەمگە تانىمال داڭقتى سپورتشىلارىمىز حالىقارالىق قىسقى جارىستاردا ونەر كورسەتىپ، ۇنەمى جۇلدەگەرلەر قاتارىنان كورىنىپ ءجۇر. الداعى قىسقى ازيا ويىندارىنا قاتىساتىن بارلىق سپورتشىعا ساتتىلىك تىلەيمىن. قىسقى ازيا ويىندارى - ەلىمىزدىڭ سپورتتىق الەۋەتىن كورسەتىپ قانا قويماي، ءاربىر سپورتشى ءۇشىن ۇلكەن جەتىستىكتەرگە جەتۋگە تالپىنىس بولاتىن ماڭىزدى كەزەڭ. قۇرامانىڭ ءار جەڭىسى - ەلىمىز ءۇشىن ۇلكەن قۋانىش! - دەدى ەربول مىرزابوسىنوۆ.

ايتا كەتەيىك، 2025-جىلعى قىسقى ازيا ويىندارى قازاقستاندا تىكەلەي ەفيردە كورسەتىلەدى.