قازاقستان قۇراماسى ازيا ويىندارىندا ءۇشىنشى التىن مەدالدى جەڭىپ الدى

 حاڭجوۋدا (ق ح ر) ءوتىپ جاتقان ازيا ويىندارىندا قازاقستاندىق اسەم ورىنباي مەن ەدۋارد ەشەنكو ستەندتىك اتۋ تۋرنيرىنىڭ ارالاس جۇپتىق سايىسىندا التىن مەدال جەڭىپ الدى، دەپ حابارلايدى قازاقپارات. 

تۋريزم جانە سپورت مينيسترلىگى ءمالىم ەتكەندەي، «سكيت» جاتتىعۋىنىڭ فينالىندا قازاقستاندىقتار كۋۆەيتتەن كەلگەن قارسىلاستارىنان وزىق بولدى. قورىتىندى ەسەپ - 40:35.

بۇل - ازياداداعى ەلىمىزدىڭ ۇلتتىق قۇراماسى ءۇشىن ءۇشىنشى التىن مەدال.

ەستەرىڭىزگە سالا كەتەيىك، كەشە اسەم ورىنباي، زويا كراۆچەنكو جانە ولگا پانارينادان جاساقتالعان قازاقستاننىڭ ايەلدەر كومانداسى «سكيت» جاتتىعۋىندا التىن مەدال جەڭىپ الىپ، ازيا ويىندارىنىڭ رەكوردىن ورناتتى. ال جەكەلەي سىندا اسەم ورىنباي قولا جۇلدەگە يە بولدى.

«ءبىزدىڭ مەرگەندەر تاعى دا كەرەمەت ناتيجە كورسەتتى! سپورتشىلاردى، جانكۇيەرلەردى جانە كوماندانىڭ جاتتىقتىرۋشىلار شتابىن وسى جەڭىسپەن قۇتتىقتايمىن. بۇكىل ەل مەرگەندەرىمىزبەن ماقتانادى. بۇل جەڭىس مىڭداعان قازاقستاندىق جەتكىنشەكتەردى وسى سپورت تۇرىمەن اينالىسۋعا شابىتتاندىراتىنىنا سەنىمدىمىن»، - دەدى تۋريزم جانە سپورت ءمينيسترى ەرمەك مارجىقپايەۆ.