قازاقستان قارا تەڭىزگە شىعاتىن جول تاپتى

استانا. KAZINFORM - بۇگىن پوتي پورتىندا (گرۋزيا) ترانسكاسپي حالىقارالىق كولىك باعىتىنىڭ ماڭىزدى بولىگى سانالاتىن ءبىرىنشى قازاقستاندىق مۋلتيمودالدى تەرمينال جۇمىسىن باستادى.

نىسان قىتاي، قازاقستان، كاسپي تەڭىزى، ازەربايجان، گرۋزيا ءارى قاراي ەۋروپا ەلدەرىن جالعايتىن ورتا ءدالىزدىڭ بولىگىنە اينالدى.

اشىلۋ ءراسىمى قازاقستان، گرۋزيا، ازەربايجان وكىلدەرىنىڭ قاتىسۋىمەن ءوتتى.

«Poti Transterminal» ا ق باس ديرەكتورى ولجاس ارىقبايەۆتىڭ سوزىنشە، تەرمينال ەكولوگيا، ءورت قاۋىپسىزدىگى مەن ينجەنەرلىك قاۋىپسىزدىك بويىنشا گرۋزيا زاڭنامالارىنىڭ تالاپتارىنا سايكەس بولدى.

نىسانعا زاماناۋي جابدىقتار ورناتىلعان. ولار: اۆستريالىق ريچتاكەرلەر مەن ساعاتىنا 25 كونەينەر وڭدەيتىن قىتايلىق كراندار.

تەرمينالدىڭ وتكىزۋ قابىلەتى ءبىرىنشى كەزەڭدە جىلىنا 120 مىڭ توننانى قۇرايدى. بولاشاقتا بۇل اۋقىم كەڭەيۋى مۇمكىن.

ق ر كولىك مينيسترلىگى كوميتەتى ءتوراعاسىنىڭ ورىنباسارى قاسىم تلەپوۆتىڭ ايتۋىنشا، تەرمينالدىڭ ىسكە قوسىلۋى ترانسكاسپي حالىقارالىق كولىك باعىتى ارقىلى جۇك تاسىمالىن ارتتىرۋدا ستراتەگيالىق قادام بولىپ تابىلادى.

- وتكەن جىلى ءبىز 4,5 ميلليون توننا جۇك تاسىمالدادىق، ءوسىم %60 قۇرادى. الداعى ءۇش جىلدا ءبول كورسەتكىشتى جىلىنا 10 ميلليونعا جەتكىزۋدى جوسپارلاپ وتىرمىز. پوتي تەرمينالى قىتايدان ەۋروپاعا جونەلتىلەتىن جۇكتەردىڭ نەگىزگى بولىگىن وڭدەۋگە مۇمكىندىك بەرەدى، - دەدى ول.

بۇل نىساننىڭ جۇمىسىنىڭ العاشقى ەكونوميكالىق تيىمدىلىگىن قازاقستان جارتىن جىلدان سوڭ-اق سەزىنە باستايدى.