قازاقستان قالالارىندا قوي باعاسى قانشا تۇرادى
قازاقستاندا كەيبىر وتباسى ايىنا ءبىر قوي ساتىپ الادى. كەيبىرى وزدەرى باعادى، ال ەندى ءبىرى سەنىمدى ادامداردان العاندى ءجون كورەدى. Kazinform ءار قالادا قوي باعاسى قانشا تۇراتىنىن ءبىلدى.
قوي باعاسى ونىڭ سالماعى مەن تۇقىمىنا قاراي ءارتۇرلى. ەڭ تومەن باعا پاۆلوداردا. مۇندا قوي قۇنى 30 مىڭ تەڭگەدەن باستالادى. استانا مەن الماتىدا قوي 35 مىڭ تەڭگەدەن ساتىلىپ جاتىر. ءبىراق ەلوردادا باعا 85 مىڭ، ال الماتىدا 150 مىڭ تەڭگەگە دەيىن جەتەدى.
تالدىقورعان، اتىراۋ، كوكشەتاۋ، قىزىلوردا، تاراز بەن شىمكەنتتە باعا 40 مىڭ تەڭگەدەن باستالادى. شىمكەنتتە قوي باعاسى سالماعى مەن تۇقىمىنا قاراي 140 مىڭ تەڭگەگە دەيىن جەتەدى. ال تارازدا قۇربان ايت كەزىندە قوي باعاسى 200 مىڭ تەڭگەگە دەيىن كوتەرىلەدى.
سەمەي، قوستاناي مەن وسكەمەندە قوي باعاسى 45-60 مىڭ تەڭگە ارالىعىندا. ورالدا باعا 45-80 مىڭ تەڭگە بولىپ تۇر. ال قاراعاندىدا قوي باعاسى 150 مىڭ تەڭگەگە دەيىن جەتەدى.
جەزقازعان مەن تۇركىستاندا قوي باعاسى 50 مىڭ تەڭگەدەن باستالىپ، كەيدە 120 مىڭ تەڭگەگە دەيىن جەتەدى. وزگەلەرگە قاراعاندا اقتاۋدا باعا جوعارى. مۇندا شوپان اتا ءتولى 70 مىڭ تەڭگەدەن باستالىپ، 120 مىڭ تەڭگەگە دەيىن جەتەدى.
ساتۋشىلار قوي سويۋ قىزمەتىن قاتار ۇسىنادى. وسكەمەندە بۇل قىزمەت 2-5 مىڭ تەڭگە ارالىعىندا، ال تۇركىستاندا 3-5 مىڭ تەڭگە تۇرادى. قىزىلوردادا قويدى 3-4 مىڭ، اقتوبەدە 4 مىڭ، پەتروپاۆلدا 5-8 مىڭ، اقتاۋدا 5-10 مىڭ، قاراعاندىدا 10 مىڭ تەڭگەگە سويىپ بەرەدى. قوستانايدا ءدىني جولمەن قوي سويۋ قىزمەتى 10-20 مىڭ تەڭگە تۇرادى. ءبىراق قازاقستاندىقتار قويدى ساتىپ الىپ، وزدەرى سويعاندى ءجون كورەدى.
