قازاقستان قالالارىندا قازى باعاسى قانشا تۇرادى
قازى - ۇلتتىق تاعام. قازاقستاندىقتار داستارحانعا قويىپ قانا قويماي، سپورتشىلارىمىز جارىستارعا دا اپارادى، دەپ حابارلايدى Kazinform اگەنتتىگىنىڭ ءتىلشىسى.

ەگەر ساتىپ الۋشى ەتتى ءوزى تاڭداپ، كوز الدىندا قازى اينالدىرىپ بەرگەنىن قالاسا، باعا سايكەسىنشە قىمبات بولادى. ەگەر تەك قازى ەمەس، ەتتى قوسا ساتىپ الساڭىز ساتۋشىلار ەداۋىر جەڭىلدىك جاسايدى. ءتىپتى ەكى ەسە ءتۇسىرىپ ساتادى. سونىمەن بىرگە سوڭعى كەزدە كىشكەنە شۇجىقتار سۇرانىسقا يە.
ەلوردا مەن ەلىمىزدىڭ تۇكپىر- تىكپىرىندەگى باعادا ۇلكەن ايىرماشىلىق جوق. ءارى بۇل ءونىمنىڭ قۇنى جىلدىڭ ءتۇرلى مەزگىلىندە كوپ وزگەرە قويمايدى. قازىرگى كەزدە دۇكەن مەن بازار سورەلەرىنەن پىسكەن، قاقتالعان، سۇرلەنگەن، شيكى ەتتى كەزىكتىرۋگە بولادى. ءبىز شيكى ەتتىڭ باعاسىن، سونىڭ ىشىندە قازى قۇنىن سالىستىرىپ كوردىك. ەلىمىز بويىنشا دايىن قازى باعاسى ورتا ەسەپپەن - 4020 تەڭگە.
قاراعاندى مەن جەزقازعاندا باعا ەڭ جوعارى. مۇندا ءبىر كەلى قازى باعاسى 4300 - 5200 تەڭگە.
ال تاراز، استانا، الماتى مەن سەمەيدە باعا شامامەن 4500-5000 تەڭگە.
اقتوبەدە ءبىر كەلى قازى باعاسى 3000-4700 تەڭگە تۇرادى. ەت دۇكەندەرىندە ارزانداۋ بولسا، سۋپەرماركەت پەن بازار باعاسى جوعارى.
وسكەمەن مەن ورالدا قازىنىڭ كەلىسى 4500 تەڭگە تۇرادى. دەگەنمەن شىعىستا كەي جەرلەردە قازىنىڭ كەلىسىن 3000 تەڭگەگە ساتىپ الۋعا بولادى. ال باتىستا 4000 تەڭگەدەن ارزانىن تاپپايسىز.
اقتاۋ قالاسىندا قازىنىڭ ورتاشا باعاسى - 4500 تەڭگە. ال ەلىمىزدىڭ سولتۇستىگىندە، ياعني، پاۆلوداردا قازىنىڭ كەلىسى 4000-4500 تەڭگە تۇرادى.
ۇلتتىق تاعامنىڭ قۇنىن بىلەتىن ادامدار قازى ءدامىن ەتتىڭ مايىنىڭ ەلىسىنە قاراي بولەدى. ءبىر ەلى مايى بولسا، ەڭ تومەنى دەپ ەسەپتەيدى. ناعىز قازى 3-4 ەلى بولادى. بۇل دەگەنىمىز قازىنى اينالدىرعاندا جارتىسى ەت، جارتىسى ماي بولعانى. شىمكەنتتە قازىنىڭ كەلىسى 3800 تەڭگە تۇرادى. ءال سۇر ەت پەن پىسكەن ەت شامامەن ودان 1-2 مىڭ تەڭگە قىمبات. ەڭ قىمباتى - قاقتالعان قازى. ونىڭ باعاسى - 9500 تەڭگە.
ەلىمىز بويىنشا كوكشەتاۋ، قوستاناي، قىزىلوردا مەن تۇركىستاندا قازى باعاسى تومەن. مۇندا 3000-3500 جانە 4000 تەڭگە.
ال ەڭ ارزانى تالدىقورعان مەن پەتروپاۆلدا. وندا باعا - 3500 تەڭگە.
