قازاقستان قالالارىندا پاتەر باعاسى قانداي

 پاتەر الۋدى نەمەسە جىلجىمايتىن مۇلىككە ينۆەستيسيا سالۋدى جوسپارلاعاندار تۇرعىن ءۇي نارىعىنداعى باعانى ۇنەمى زەردەلەيتىنى انىق. 

وسى ورايدا قازاقپارات ءتىلشىسى جاڭا جانە ەكىنشى نارىقتاعى پاتەرلەردىڭ قۇنىن انىقتاپ كوردى.

بۇگىندە قازاقستان بويىنشا جاڭا پاتەرلەردىڭ 1 شارشى مەترىنە ارنالعان ورتاشا قۇنى - 486364 تەڭگە.

ال قالالار ىشىندە استانا، الماتى، شىمكەنت، اقتاۋ، اتىراۋ جانە سەمەيدە ءۇي قىمبات تۇرادى.

ەڭ ارزان پاتەرلەر - جەزقازعاندا. ويتكەنى، وندا تۇرعىن ۇيلەر تەك مەملەكەتتىك باعدارلاما اياسىندا سالىنىپ جاتىر.

سونىمەن بىرگە اقتوبە، كوكشەتاۋ، ورال مەن قىزىلوردا شاھارلارىندا باسپانا قۇنى سالىستىرمالى تۇردە ارزان.

ال ەكىنشى نارىقتاعى پاتەرلەردىڭ باعاسى جاڭا ءۇيدىڭ قۇنىنان الدەقايدا قىمبات. بۇل تىزىمدە تاعى دا استانا، الماتى، شىمكەنت قالالارى كوش باستاپ تۇر.

سونداي-اق، قونايەۆ، تالدىقورعان جانە سەمەي شاھارلارىنان پاتەر ساتىپ الۋعا نيەتتىلەردىڭ قالتاسى قالىڭ بولعانى ابزال.

سەبەبى اتالعان قالالاردا ءار شارشى مەتردىڭ ورتاشا قۇنى - 400-460 مىڭ تەڭگە ارالىعىندا.

ال تاراز، تۇركىستان مەن كوكشەتاۋدا ەكىنشى نارىقتاعى ۇيلەردىڭ باعاسى وزگە وڭىرلەرمەن سالىستىرعاندا ءبىرشاما ارزان. وندا 1 شارشى مەترگە ارنالعان ورتاشا باعا 290 مىڭ تەڭگەنىڭ ماڭايىندا.

ۇلتتىق ستاتيستيكا بيۋروسىنىڭ دەرەكتەرىنە ساي، جالپى نارىقتا جاڭا پاتەرلەردىڭ باعاسىندا تومەندەۋ نەمەسە قىمباتتاۋ بايقالعان جوق.

دەگەنمەن ەكىنشى نارىقتاعى باسپانا قۇنى 1,8 پايىزعا ارزانداعان.