قازاقستان نەلىكتەن اتوم ەنەرگەتيكاسىنا كوشۋى ءتيىس - مامان پىكىرى
استانا. KAZINFORM - استانادا ءتۇرلى ەلدەردىڭ جەتەكشى ساراپشىلارى مەن عالىمدارىن جيناعان «قازاتومەكسپو» اتوم ەنەرگەتيكاسىنىڭ حالىقارالىق كورمەسى ءساتتى اياقتالدى.
ءىس-شارا اتوم ەنەرگەتيكاسىن دامىتۋدىڭ نەگىزگى ماسەلەلەرىنە جانە ونىڭ تۇراقتى ەنەرگەتيكالىق بولاشاقتى قامتاماسىز ەتۋدەگى رولىنە نازار اۋداردى.
قازاقستاننىڭ ەلەكترو ەنەرگەتيكالىق قاۋىمداستىعىنىڭ ءتوراعاسى تالعات تەمىرحانوۆ يادرولىق ەنەرگەتيكاعا كوشۋ كومىر ونەركاسىبىنە جۇمسالاتىن شىعىنداردىڭ ارتۋىنا عانا ەمەس، سونىمەن قاتار كومىرتەگى شىعارىندىلارىن ازايتۋ جونىندەگى حالىقارالىق مىندەتتەمەلەردى ورىنداۋ قاجەتتىلىگىنە دە بايلانىستى ەكەنىن اتاپ ءوتتى.
«ەنەرگەتيكا سەكتورىنىڭ دامىپ كەلە جاتقانىنا 7-10 جىل بولىپ قالدى، وسىنداي جاعدايدا بىزگە ناقتى شەشىم قابىلداۋ كەرەك. بولاشاقتا بىزگە نە ماڭىزدى؟ كومىر ءوندىرىسىن قولداۋعا قاراجات قۇياتىن بولساق، ءبىز ەكولوگيالىق مىندەتتەمەلەرىمىزدى ورىنداي المايمىز. نەمەسە قازىر ءبىز دامۋ ۆەكتورىمىزدى ەكولوگيالىق تۇرعىدان ىڭعايلى باعىتقا بۇرۋىمىز كەرەك. بۇل - شىعارىندىلارى جوق اتوم، قالدىقتارى وتە از مولشەردە قالىپتاسادى، سونداي- اق 2 مىڭداي جۇمىس ورنىن قۇرۋعا مۇمكىندىك بەرەدى. قازاقستاندىقتار جوعارى تەحنولوگيالىق نىساندا جۇمىس ىستەيتىن بولادى، ولاردىڭ بىلىكتىلىگى وسەدى»، - دەپ اتاپ ءوتتى سپيكەر.
اتوم ەلەكتر ستانتسيالارى وندىرەتىن ەلەكتر ەنەرگياسىنىڭ قۇنى تۋرالى ماسەلەگە جاۋاپ رەتىندە تالعات تەمىرحانوۆ بولاشاق تاريفتەر بۇگىنگىدەن كوپ بولمايتىنىن ايتتى.
«قازىر ءبىزدىڭ كوپتەگەن وتانداستارىمىز اتوم ەلەكتر ستانتسياسى ارقىلى وندىرىلەتىن ەلەكتر ەنەرگياسى قىمبات بولادى دەپ قاتەلەسەدى. ءبىزدىڭ باعالاۋىمىز بويىنشا، بۇل ءبىز كورشىلەرىمىزدەن الاتىن ەڭ جوعارى جۇكتەمەلەردەگى ەنەرگيا ءۇشىن تولەيتىن باعادان قىمبات بولمايدى. ءبىز ەڭ جوعارى جۇكتەمەگە شامامەن 30-40 تەڭگە كولەمىندە كورشىلەرىمىزدەن ەلەكتر ەنەرگياسىن ساتىپ الامىز. نەلىكتەن؟ سەبەبى بىزدە وسى ديناميكالىق قۇبىلىستاردىڭ بارلىعىن جەڭىلدەتەتىن ءبىرىڭعاي ساتىپ الۋ تەتىگى بار»، - دەپ اتاپ ءوتتى تالعات تەمىرحانوۆ.
