قازاقستان موڭعولياعا ۆاگون ەكسپورتتايدى

استانا. KAZINFORM - موڭعولياعا اتىراۋ ۆاگون قۇراستىرۋ زاۋىتىنىڭ ونىمدەرى ساتىلماق. بۇل جونىندە قازاقستاننىڭ سىرتقى ساۋدا پالاتاسىنىڭ باسقارما ءتوراعاسى مۇرات قارىمساقوۆ قازاقستان-موڭعوليا بيزنەس فورۋمىندا مالىمدەدى.

- بۇگىنگى بيزنەس فورۋمدا اتىراۋ ۆاگون قۇراستىرۋ زاۋىتىنىڭ ونىمدەرىن ساتىپ الۋ بويىنشا كەلىسىمشارتقا قول قويىلادى. مەنىڭشە، موڭعوليا شامامەن 6,7 ميلليون دوللار قارجىعا ۆاگون الادى. دەگەنمەن، بۇل - باسى. بىرتە-بىرتە ساۋدا كولەمى ۇلعايادى، -دەدى ول جۋرناليستەرگە سۇحبات بەرە وتىرىپ.

سونىمەن بىرگە، مۇرات قارىمساقوۆ ەلىمىز موڭعولياعا ەكسپورتتايتىن باسقا دا تاۋارلاردى اتاپ ءوتتى.

- بىزدەن بۇل ەل ەلەكترونيكا، ازىق-تۇلىك، مەتاللۋرگيا، قۇرىلىس زاتتارىن، استىق ونىمدەرىن ساتىپ الادى. ال قازاقستان موڭعوليادان تەرى ونىمدەرى، كوكونىستەر ت. ب. تاۋارلار يمپورتتايدى، - دەدى ول.

ايتا كەتەيىك، بۇعان دەيىن توقايەۆ پەن حۋرەلسۇح قازاقستان مەن موڭعوليانى جالعايتىن اۆتوجول سالۋعا كەلىسكەنىن جازعانبىز.