قازاقستان مۇناي-حيميا سالاسىنداعى ءبىرقاتار جوبانى قاراستىرۋدا
استانا. KAZINFORM - قازاقستان مۇناي-حيميا سالاسىندا قۇنى 14 ميلليارد دوللار بولاتىن ءبىرقاتار جوبانى قاراستىرىپ جاتىر. بۇل تۋرالى ق ر پرەزيدەنتى جانىنداعى شەتەلدىك ينۆەستورلار كەڭەسىنىڭ 36-پلەنارلىق وتىرىسىندا مەملەكەت باسشىسى قاسىم-جومارت توقايەۆ ايتتى.
«حالىقارالىق مۇناي كومپانيالارى ەلدىڭ دامۋىندا باستى ءرول اتقاردى. ولاردىڭ قازاقستاندا بولۋى ينۆەستيتسيالىق تارتىمدىلىقتىڭ بەلگىسى سانالادى. شەتەلدىك ينۆەستورلار ينۆەستيتسيانى كاپيتال، وزىق تەحنولوگيالار جانە جوعارى بىلىكتى جۇمىس كۇشى تۇرىندە ۇسىنادى. ينۆەستيتسيا ءبىزدىڭ ەنەرگەتيكا سالامىزدىڭ وسۋىنە ىقپال ەتتى. سوڭعى 30 جىلدا مۇناي ءوندىرۋ ءۇش ەسە ءوستى. بۇل جەتىستىك قازاقستانعا مۇناي ءوندىرۋدىڭ ءوسۋ قارقىنى جوعارى ەلدەردىڭ بەستىگىنە كىرۋگە مۇمكىندىك بەردى. بولاشاققا كوز جۇگىرتسەك، ءبىز جىلىنا 100 ميلليون توننا شەكتى ەڭسەرۋگە تىرىسامىز»، - دەدى پرەزيدەنت.
مەملەكەت باسشىسى گاز ونەركاسىبىنىڭ دامۋى قىزىعۋشىلىق تۋدىراتىندىعىن باسا ايتتى.
«ءبىز جاڭا گاز كەن ورىندارىن ىزدەۋدى باستاۋ ارقىلى Chevron كومپانياسىمەن بىرلەسكەن قىزمەتىمىزدى كەڭەيتتىك. اقتوبە وبلىسىنداعى جاليبەك كەن ورنىن بارلاۋ تۋرالى كەلىسىمگە قول قويىلدى. بۇل - ءبىزدىڭ ەكىجاقتى ىنتىماقتاستىعىمىزداعى ماڭىزدى قادام. مۇناي-حيميا ونەركاسىبىن دامىتۋ قازاقستان ەكونوميكاسىن ساۋىقتىرۋ ءۇشىن دە شەشۋشى مانگە يە. 2022-جىلى ءبىز قۋاتتىلىعى جىلىنا 500000 توننا بولاتىن ورتالىق ازياداعى ەڭ ءىرى پوليپروپيلەن زاۋىتىن ىسكە قوستىق. قازىرگى ۋاقىتتا بۇل كاسىپورىن ىشكى سۇرانىستىڭ 60 پايىزىن قاناعاتتاندىرادى جانە ءوز ونىمدەرىن ەۋروپاعا، تۇركيا مەن قىتايعا ەكسپورتتايدى. وسى جىلدىڭ قىركۇيەگىندە ءبىز جىلىنا 102 ميلليون توننا پوليەتيلەن شىعاراتىن زاۋىت سالۋدى باستادىق. قازىرگى ۋاقىتتا 14 ميلليارد دوللارلىق مۇناي-حيميا سالاسىنداعى ءبىرقاتار جوبا قاراستىرىلىپ جاتىر»، - دەدى قاسىم-جومارت توقايەۆ.
بۇعان دەيىن قازاقستان تەحنيكالىق جانە كاسىپتىك ءبىلىم بەرۋ ساپاسىن ارتتىرۋعا دايىن ينۆەستورلاردى ىزدەيتىندىگىن جازعان ەدىك.
