قازاقستان مەن وزبەكستان سىرداريا بويىنا سۋ ەسەپتەيتىن قۇرىلعىلار ورناتۋدى بيىل اياقتايدى
تاشكەنت. KAZINFORM - سىرداريا بويىنا سۋ ەسەپتەيتىن قۇرىلعىلاردى ورناتۋمەن اينالىساتىن شەتەلدىك كومپانيا بۇگىندە تەندەر وتكىزىپ جاتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

وزبەكستان استاناسىندا وتكەن ەكىجاقتى كەزدەسۋدەن سوڭ Kazinform ءتىلشىسىنىڭ ساۋالىنا جاۋاپ بەرگەن سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ قۇرىلعىلاردى ورناتۋ جۇمىسى قالاي ءجۇرىپ جاتقانىن ايتتى.
- ءبىز بىلتىر سىرداريا بويىنا سۋدىڭ كولەمىن انىقتايتىن ارنايى 10 قۇرىلعىنى ورناتۋعا ۋاعدالاسقان ەدىك. جابدىقتاردى ۇسىنىپ، ونى ورناتۋمەن نەمىستىڭ GIZ كومپانياسى اينالىسادى. بۇل كاسىپورىن ازىرگە تەندەر جۇمىستارىن جۇرگىزىپ جاتىر. 15-اقپاندا ونىڭ قورىتىندىسى شىعۋى ءتيىس. سۋ ەسەپتەيتىن قۇرىلعىلاردى ورناتۋدى بيىل اياقتاۋدى جوسپارلاپ وتىرمىز، - دەدى مينيستر.
سپيكەردىڭ سوزىنشە، قازاقستاندا – 5، وزبەكستان اۋماعىندا تاعى 5 سۋ ەسەپتەيتىن قۇرىلعى ورناتىلادى.
- وسىنىڭ ناتيجەسىندە سىرداريا وزەنىندەگى سۋدىڭ كولەمى تۋرالى مالىمەتتەردى اۆتوماتتى تۇردە الىپ وتىرامىز. قازىرگى تاڭدا وزبەكستان ەسەپتەۋ قۇرىلعىلارىن تاجىك تاراپىمەن دە بىرلەسىپ ورناتۋعا كىرىستى. وسى ورايدا، ولاردان الىناتىن اقپاراتتاردى دا ءبىزدىڭ جۇيەمەن ينتەگراتسيالاۋعا كەلىستىك، - دەپ ءتۇسىندىردى ن. نۇرجىگىتوۆ.
ناقتىلاي كەتەيىك، اتالعان قۇرىلعىلاردى ورناتۋعا قازاقستان مەن وزبەكستان قاراجات بولمەيدى. بۇل قىزمەتتى GIZ كومپانياسى ءوزارا ارىپتەستىك نەگىزدە تەگىن كورسەتپەك.
ءمينيستردىڭ ايتۋىنشا، قازاقستان مەن وزبەكستان سۋ ءبولۋ كەلىسىمىنىڭ جوباسىن ازىرلەپ جاتىر.
سونىمەن قوسا، قازىرگى ۋاقىتقا دەيىن شاردارا قويماسىنا 4,5 ميلليارد تەكشە مەتر سۋ جينالدى. وتكەن جىلدىڭ سايكەس كەزەڭىمەن سالىستىرعاندا بۇل 1,87 ميلليارد تەكشە مەترگە ارتىق. نۇرجان نۇرجىگىتوۆ سۋ ماسەلەسىنە قاتىستى پىكىر بىلدىرە وتىرىپ، «جاعداي بىلتىرعىدان جامان بولمايدى»، دەپ سەندىردى.