قازاقستان مەن وزبەكستان سۋ ءبولۋ كەلىسىمىنىڭ جوباسىن ازىرلەپ جاتىر
تاشكەنت. KAZINFORM - بۇگىن تاشكەنتتە قازاقستان مەن وزبەكستاننىڭ سۋ شارۋاشىلىعى مينيسترلەرى ەكىجاقتى كەزدەسۋ وتكىزدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

ق ر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ پەن ونىڭ وزبەكستاندىق ارىپتەسى شاۆكات حامرايەۆ ۆەگەتاتسياارالىق كەزەڭدەگى جۇمىستاردىڭ اتقارىلۋ بارىسىن تالقىلادى.
- بىلتىر جەلتوقساندا ءبىز اشحاباد قالاسىندا كەستەنى كەلىسكەن بولاتىنبىز. وعان ساي، ۋاعدالاسقان كولەمدەگى سۋدى 100 پايىزدان كوپ كولەمدە الىپ وتىرمىز. 10-قاڭتارداعى ەسەپكە سايكەس، قىرعىزستان مەن وزبەكستان باعىتتاعان 2 ميلليارد تەكشە مەتردەن استام سۋ شاردارا سۋ قويماسىنا ءتۇستى. ءوز كەزەگىندە ول سۋ سولتۇستىك ارالعا جانە قىزىلوردا وبلىسىنداعى كولشىك جۇيەلەرىنە جىبەرىلىپ جاتىر. جالپى، قوس تاراپتان دا تولىق تۇسىنىستىك بار. ەكى ەل ءوز مىندەتتەمەلەرىن %100 ورىنداپ وتىر، - دەدى نۇرجان نۇرجىگىتوۆ Kazinform ءتىلشىسىنىڭ ساۋالىنا جاۋاپ بەرە وتىرىپ.
مينيستر اتاپ وتكەندەي، قازىرگى تاڭدا قازاقستان مەن وزبەكستان سۋ ءبولۋ كەلىسىمىنىڭ جوباسىن ازىرلەپ جاتىر.
- ءبىز ەلىمىزدىڭ مەملەكەتتىك ورگاندارىمەن كەلىسىلگەن جوبانى وزبەك تاراپىنا بەردىك. 15 كۇن ىشىندە ولار بىزگە جاۋاپ جولدايدى. سونىمەن قاتار، تاشكەنتتەگى كەزدەسۋ بارىسىندا ەكى ەلدىڭ يرريگاتسيالىق جۇيەلەرىن جاڭعىرتۋ جۇمىستارىن تالقىلادىق. ونىڭ ناتيجەسىندە ۆەگەتاتسيالىق كەزەڭگە دەيىن بىرلەسىپ جوندەۋ جۇرگىزۋ كەلىسىمىنە كەلدىك، - دەپ توقتالدى ۆەدومستۆو باسشىسى.
ەسكە سالايىق، بيىل 29-قاڭتاردا دۋشانبە قالاسىندا ورتالىق ازيانىڭ مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ 88-وتىرىسى ءوتتى. ونىڭ بارىسىندا جاسالعان كەلىسىم ناتيجەسىندە قازاقستان كورشىلەس ەلدەردەن كوكتەمدە 11 ميلليارد تەكشە مەتر سۋ الاتىن بولدى.