قازاقستان مەن وزبەكستان شەكاراسىندا 400 دەن اسا جۇك كولىگى كەپتەلىستە تۇر
اقتاۋ. KAZINFORM - كولىكتەر مەملەكەتتىك شەكارانىڭ قازاقستان اۋماعىندا «تاجەن» وتكىزۋ پۋنكتىندە جينالىپ قالعان.
ماڭعىستاۋ وبلىسى بويىنشا مەملەكەتتىك كىرىستەر دەپارتامەنتىنىڭ مالىمەتىنشە، 2024 -جىلى 25-قاراشادا وزبەكستان رەسپۋبليكاسىندا « ءداۋىت-اتا - قوڭىرات» (400 شاقىرىم) اۆتوموبيل جولىنىڭ اشىلۋى، وتكىزۋ پۋنكتىندە كولىك كەپتەلىسىنىڭ بولۋىنا اسەر ەتكەن. وسىعان بايلانىستى جۇك كولىكتەرىنىڭ اعىنى كوپ.
- بۇدان باسقا، قازىرگى ۋاقىتتا «تاجەن» وتكىزۋ پۋنكتىندە وتكىزۋ پۋنكتىن جاڭعىرتۋ جانە تەحنيكالىق جەتە جاراقتاندىرۋ شەڭبەرىندە قۇرىلىس-مونتاجداۋ جۇمىستارى جۇرگىزىلۋدە،- دەپ تولىقتىردى قۇزىرلى ورگان.
وسىعان بايلانىستى ماڭعىستاۋ وبلىسى بويىنشا مەملەكەتتىك كىرىستەر دەپارتامەنتى مەملەكەتتىك شەكارا ارقىلى وتكىزۋدى ۇزاق كۇتپەۋ ءۇشىن، تاۋارلاردى تاسىمالداۋدىڭ بالامالى باعىتتارىن تاڭداپ نەمەسە تاۋارلاردى جەتكىزۋگە كوبىرەك ۋاقىت ءبولۋدى ۇسىندى.
سونداي-اق، دەپارتامەنت تاراپىنان كەدەندىك وپەراتسيالاردى جەدەلدەتۋگە باعىتتالعان قوسىمشا شارالار قابىلدانعان.
بۇعان دەيىن حابارلاعانىمىزداي، قازاقستان مەن وزبەكستان شەكاراسىنان جەكە كۋالىكپەن ءوتۋ ءتارتىبى ەنگىزىلەدى.
