قازاقستان مەن وزبەكستان عارىش سالاسىنداعى سەرىكتەستىكتى نىعايتۋعا نيەتتى

تاشكەنت. KAZINFORM - بۇگىندە قازاقستان مەن وزبەكستان بارلىق سالاداعى بايلانىستاردى نىعايتىپ كەلەدى.

ولاردىڭ ىشىندە عارىش كەڭىستىگىن بىرلەسىپ يگەرۋ دە باسىم باعىت سانالادى. بىرنەشە جىل بۇرىن قوس مەملەكەت سالا ماماندارىن وقىتۋ باعدارلاماسىن جۇزەگە اسىرسا، ەندىگى كەزەكتە جاڭا سپۋتنيك قۇراستىرۋ جوبالارىن تالقىلاپ، اقپارات الماسۋ ءىسىن جوعارى دەڭگەيگە كوتەرىپ جاتىر، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

ءبىزدىڭ ەلىمىزبەن وزبەكستان عارىش كەڭىستىگىن سەرىكتەستىكتە يگەرىپ كەلەدى. ماسەلەن، قوس مەملەكەت ىنتىماقتاستىق اياسىندا مونيتورينگىمەن اينالىساتىن مامانداردى دايارلاپ، تاجىريبە الماسىپ وتىرادى.

«وزبەكعارىش» اگەنتتىگى قۇرىلعان ساتتەن باستاپ «قازعارىش» وعان ماڭىزدى سەرىكتەس بولدى. باستاپقىدا، ياعني 2021-جىلدىڭ سوڭىندا عارىشتى بەيبىت ماقساتتا يگەرۋ جونىندەگى ەكى ەلدىڭ ۇكىمەتارالىق كەلىسىمى بەكىتىلدى. سونىڭ اياسىندا قىزمەتكەرلەرىمىزدى وقىتۋعا باعىتتالعان ناتيجەلى جۇمىس اتقارىلدى. ءارى عارىشتىق مونيتورينگ تاجىريبەسى ۇلگى رەتىندە الىندى. ءبىرقاتار پيلوتتىق جوبا ىسكە استى»، - دەپ توقتالدى وزبەكستان عارىشتىق تەحنولوگيا جانە زەرتتەۋ اگەنتتىگىنىڭ ءبولىم باسشىسى يسمايل راسۋلوۆ.

ازىرگە كورشىلەس ەلدىڭ قاشىقتان زوندتاۋعا ارنالعان ءوز سپۋتنيگى جوق. بۇعان قاراماستان وزبەكستاندا عارىشتىق مونيتورينگ مەملەكەتتىك دەڭگەيدە بەكىتىلگەن. ياعني، كوسموستان جاسالعان سۋرەتتەر نەگىزىندە الىنعان اقپاراتتارعا قاتىستى قاجەتتى شارالار ۇكىمەت دارەجەسىندە قابىلدانادى. ال قازاقستاندا عارىشتىق مونيتورينگى مەملەكەتتىك دەڭگەيدەگى مارتەبەگە يە ەمەس.

قازاقستان مەن وزبەكستان اراسىندا عارىشتان تۇسىرىلگەن سۋرەتتەردى الماسۋ كەلىسىمى بار. بۇل باعىتتا كوممەرتسيالىق مامىلە جاسالعان. وسى كۇنى ورتالىق ازياداعى 5 ەل بىرىگىپ، عارىشقا جەكە جەرسەرىكتەر شوعىرىن قالىپتاستىرۋ باستاماسىن دا كوتەردى. بۇل رەتتە ءبىزدىڭ ەل كورشىلەرگە سپۋتنيك قۇراستىرىپ، ونى كوككە ۇشىراتىن ينفراقۇرىلىم ۇسىنۋعا دايىن.

ەسكە سالا كەتەيىك، بۇگىن - بۇكىلالەمدىك اۆياتسيا جانە كوسموناۆتيكا كۇنى.