قازاقستان مەن توگو پرەزيدەنتتەرى كەڭەيتىلگەن قۇرامدا كەلىسسوز جۇرگىزدى

قاسىم-جومارت توقايەۆ پەن فور ەسسوزيمنا گناسسينگبە ەكى مەملەكەتتىڭ رەسمي دەلەگاتسيالارىنىڭ قاتىسۋىمەن كەڭەيتىلگەن قۇرامدا كەلىسسوز جۇرگىزدى.

Kazinform بۇل تۋرالى اقورداعا سىلتەمە جاساپ حابارلايدى.

قازاقستان پرەزيدەنتى توگو دەلەگاتسياسىنا ءىلتيپات بىلدىرە وتىرىپ، دوستاس ەكى ەل اراسىنداعى ديپلوماتيالىق قاتىناستاردىڭ 10 جىلدىعى قارساڭىندا استانادا ءوتىپ جاتقان بۇل ساپاردىڭ سيمۆولدىق ءمانى بار ەكەنىن اتاپ ءوتتى.

«بۇگىنگى كەلىسسوزدەر ەكىجاقتى بايلانىستاردىڭ جاڭا كەزەڭىن ايقىنداپ، ءوزارا ءتيىمدى ىنتىماقتاستىعىمىزدىڭ پەرسپەكتيۆتى باعىتتارىن زەردەلەۋگە زور مۇمكىندىك بەرەدى. ءبىز توگومەن اراداعى ىقپالداستىقتى نىعايتۋعا مۇددەلىمىز جانە ءسىزدىڭ ەلىڭىزدى افريكاداعى ماڭىزدى سەرىكتەس رەتىندە قاراستىرامىز»، - دەدى مەملەكەت باسشىسى.

پرەزيدەنت ەكى ەلدىڭ ءبىر-بىرىنەن الىس جاتقانىنا قاراماستان، ورتاق تۇستارى كوپ ەكەنىنە، اتاپ ايتقاندا، كوپ كونفەسسيالى جانە كوپ ەتنوستى قۇرامىمەن ەرەكشەلەنەتىنىنە توقتالدى.

«قازاقستاندا 100 دەن استام ەتنوس وكىلدەرى تۇرادى. كونفەسسياارالىق جانە ءدىنارالىق ديالوگتى دامىتۋ - ءبىزدىڭ مەملەكەتتىك ساياساتىمىزدىڭ باسىم باعىتتارىنىڭ ءبىرى»، - دەدى قاسىم-جومارت توقايەۆ.

مەملەكەت باسشىسىنىڭ پىكىرىنشە، قازاقستان مەن توگو اراسىنداعى سەرىكتەستىكتىڭ الەۋەتى ءالى تولىق پايدالانىلماي وتىر. ونى دامىتۋ ءۇشىن ەكىجاقتى قۇجاتتارعا، سونىڭ ىشىندە ينۆەستيتسيالاردى ءوزارا قورعاۋ تۋرالى كەلىسىمگە قول قويۋ قاجەت.

قازاقستان پرەزيدەنتى ەكىجاقتى ساۋدا-ساتتىقتى وركەندەتۋ جانە ىسكەر توپتار اراسىنداعى بايلانىستى نىعايتۋ ماڭىزدى ەكەنىنە توقتالىپ، قازاقستاننىڭ توگوداعى قۇرمەتتى كونسۋلى لاۋازىمىنا لايىقتى كانديداتتى انىقتاۋدى ۇسىندى. مەملەكەت باسشىسى مۇنداي قادام ەكى ەل اراسىندا B2B فورماتىنداعى بايلانىستاردى دامىتۋعا سەپتىگىن تيگىزەدى دەپ ەسەپتەيدى.

«بۇكىل الەمدەگى حالىقارالىق ىنتىماقتاستىقتى نىعايتۋعا اتسالىسۋ ىسىندە قازاقستان مەن توگو سياقتى مەملەكەتتەر مەيلىنشە بەلسەندى جانە كونسترۋكتيۆتى ءرول اتقارا الادى دەپ سانايمىن»، - دەدى مەملەكەت باسشىسى.

مەملەكەت باسشىسى قاسىم-جومارت توقايەۆتىڭ شاقىرۋىمەن 27-28- قاراشادا توگو رەسپۋبليكاسىنىڭ پرەزيدەنتى فور ەسسوزيمنا گناسسينگبە قازاقستانعا رەسمي ساپارمەن كەلەتىنىن بۇعان دەيىن جازعان بولاتىنبىز. بۇگىن ق ر پرەزيدەنتى اقوردادا فور ەسسوزيمنا گناسسينگبەنى سالتاناتتى تۇردە قارسى الدى. كەيىن قوس ەل باسشىلارى شاعىن قۇرامدا كەلىسسوز وتكىزدى.