قازاقستان مەن تۇركيا پارلامەنتىنىڭ سپيكەرلەرى تۇركىستانعا باردى

تۇركىستان. KAZINFORM - قازاقستان پارلامەنتى ءماجىلىسىنىڭ ءتوراعاسى ەرلان قوشانوۆ پەن تۇركيا ۇلى ۇلتتىق ءماجىلىسىنىڭ سپيكەرى نۋمان كۋرتۋلمۋش تۇركى الەمىنىڭ رۋحاني استاناسى - تۇركىستان قالاسىنا باردى.

تۇركيا ۇلى ۇلتتىق ءماجىلىسى ءتوراعاسىنىڭ قازاقستانعا رەسمي ساپارى بۇگىن تۇركىستاندا جالعاستى.

الدىمەن ەرلان قوشانوۆ پەن نۋمان كۋرتۋلمۋش كيەلى جەرلەردى ارالاپ، ارىستان باب، قوجا احمەت ياساۋي، رابيعا بەگىم كەسەنەلەرىندە بابالار رۋحىنا تاعزىم ەتتى.

تۇستەن كەيىن تۇركيا ۇلى ۇلتتىق ءماجىلىسىنىڭ ءتوراعاسى قوجا احمەت ياساۋي اتىنداعى حالىقارالىق قازاق- تۇرىك ۋنيۆەرسيتەتىندە « ХХІعاسىرداعى تۇركى الەمىنىڭ ورنى» اتتى كونفەرەنتسياعا قاتىستى.

نۋمان كۋرتۋلمۋش قازاقستانعا ساپارى جەمىستى ءوتىپ جاتقانىنا نازار اۋداردى.

- كەشە ءبىز مەملەكەت باسشىسى قاسىم-جومارت توقايەۆتىڭ قابىلداۋىندا بولدىق. پارلامەنت پالاتالارىنىڭ توراعالارىمەن كەزدەستىك. بۇگىن تۇركىستاندا وزدەرىڭىزبەن جۇزدەسىپ وتىرمىن. جالپى، قازاقستاننىڭ ءبىز ءۇشىن ورنى بولەك. ال قوجا احمەت ياساۋي بابامىز - يسلام الەمىندە ەسىمى ەرەكشە تۇلعا. ونىڭ ەڭبەكتەرى مەن اسىل مۇرالارى تورتكۇل دۇنيەگە كەڭ تاراعان. انادولى مەن بالقان ەلدەرىنە دەيىن ياساۋي ءىلىمىنىڭ ءىزى جاتىر. عۇلامانىڭ حيكمەتتەرى مەن بىزگە جەتكەن تاعىلىمدى مۇراسى مەملەكەتتەرىمىزدى بايلانىستىرادى، - دەدى تۇركيا ۇلى ۇلتتىق ءماجىلىسىنىڭ ءتوراعاسى.