قازاقستان مەن سولتۇستىك ماكەدونيا ىسكەرلىك كەڭەس قۇرۋ تۋرالى كەلىسىمگە قول قويدى

ساپار مەملەكەت باسشىسىنىڭ تاپسىرمالارىن ورىنداۋ اياسىندا، سونداي-اق 2025-جىلعى مامىردا Astana International Forum الاڭىندا قازاقستان پرەزيدەنتى قاسىم-جومارت توقايەۆ پەن سولتۇستىك ماكەدونيا پرەزيدەنتى گوردانا سيليانوۆسكا-داۆكوۆا اراسىندا وتكەن كەلىسسوزدەردىڭ قورىتىندىسىنا سايكەس جۇزەگە اسىرىلدى.

ساپار بارىسىندا سولتۇستىك ماكەدونيا پرەزيدەنتى گوردانا سيليانوۆسكا-داۆكوۆا ارمان شاققالييەۆتى قابىلدادى. كەزدەسۋ كەزىندە پرەزيدەنتكە ەكىجاقتى ساۋدا-ەكونوميكالىق ىنتىماقتاستىقتىڭ قازىرگى جاعدايى مەن ونى كەڭەيتۋ پەرسپەكتيۆالارى تۋرالى اقپارات ۇسىنىلدى.

- ءبىز قازاقستان مەن سولتۇستىك ماكەدونيا اراسىنداعى ساۋدا- ەكونوميكالىق ىنتىماقتاستىقتى ودان ءارى كەڭەيتۋگە جانە جاڭا باعىتتار بويىنشا دامىتۋعا مۇددەلىمىز. بۇل ساپار ەكىجاقتى بايلانىستاردى ناقتى مازمۇنمەن تولىقتىرۋعا باعىتتالعان ماڭىزدى قادام بولدى، - دەلىنگەن كەلىسسوزدەر قورىتىندىسىندا.

سونداي-اق سيليانوۆسكا-داۆكوۆا 2025 -جىلعى مامىردا استاناعا جاساعان ساپارىن جىلى ەسكە الىپ، قازاقستان پرەزيدەنتى قاسىم-جومارت توقايەۆقا جانە قازاقستان حالقىنا ىزگى تىلەكتەرىن جەتكىزدى. ول مەملەكەت باسشىلارىنىڭ انتاليا ديپلوماتيالىق فورۋمى الاڭىندا وتكەن سوڭعى كەزدەسۋىن اتاپ ءوتىپ، حالىقارالىق ديالوگتى دامىتۋ ماڭىزىن ەرەكشە ايتتى.

ساپار اياسىندا ارمان شاققاليەۆ سولتۇستىك ماكەدونيانىڭ سىرتقى ىستەر جانە سىرتقى ساۋدا ءمينيسترى تيمچو مۋتسۋنسكيمەن كەلىسسوزدەر جۇرگىزدى. تاراپتار ەكىجاقتى ساۋدانىڭ قازىرگى جاعدايى مەن دامۋ پەرسپەكتيۆالارىن جان-جاقتى تالقىلاپ، تاۋار اينالىمىنىڭ تۇراقتى وسۋىنە جاعداي جاساۋ ماسەلەسىنە ەرەكشە نازار اۋداردى.

100 دەن استام ماكەدونيالىق جانە ءبىرقاتار قازاقستاندىق كومپانيالاردىڭ قاتىسۋىمەن وتكەن بيزنەس-فورۋم قورىتىندىسى بويىنشا قازاقستاننىڭ سىرتقى ساۋدا پالاتاسى مەن سولتۇستىك ماكەدونيانىڭ ەكونوميكالىق پالاتاسى اراسىندا ىسكەرلىك كەڭەس قۇرۋ تۋرالى كەلىسىمگە قول قويىلدى. سونىمەن قاتار «QazTrade» ساۋدا ساياساتىن دامىتۋ ورتالىعى» ا ق مەن سولتۇستىك ماكەدونيانىڭ ينۆەستيتسيالار تارتۋ جانە ەكسپورتتى ىلگەرىلەتۋ اگەنتتىگى اراسىندا بىرلەسكەن بيزنەس-جوبالاردى ىسكە اسىرۋعا باعىتتالعان ىنتىماقتاستىق تۋرالى مەموراندۋم جاسالدى.

- ىسكەرلىك كەڭەس قۇرۋ ەكى ەلدىڭ بيزنەس- قوعامداستىقتارى اراسىنداعى بايلانىستى كۇشەيتىپ، جاڭا ينۆەستيتسيالىق جوبالاردى جۇزەگە اسىرۋعا مۇمكىندىك بەرەدى، - دەلىنگەن اقپاراتتا.

بيزنەس- فورۋم ناتيجەسىندە شامامەن 500 ميلليون تەڭگە سوماسىنا كوممەرتسيالىق قۇجاتتارعا قول قويىلدى.

سكوپەگە ساپار بارىسىندا مينيستر «Bunardzik» تەحنولوگيالىق جانە ونەركاسىپتىك دامۋ ايماعىندا بولىپ، ەكولوگيالىق تازا ءوندىرىس پەن وزىق تەحنولوگيالارعا مامانداندىرىلعان ورتالىقتىڭ جۇمىسىمەن تانىستى.

ساپاردىڭ جالعاسى رەتىندە ستامبۋل قالاسىندا ءىرى تۇرىك بيزنەس وكىلدەرىمەن كەزدەسۋلەر ءوتتى. ولاردىڭ قاتارىندا Orzax Group, Roz Metal جانە Safi Holding كومپانيالارى بار. كەلىسسوزدەر بارىسىندا اتالعان كومپانيالار قازاقستانداعى قاتىسۋىن كەڭەيتۋگە، ينۆەستيتسيالىق جوبالاردى ىسكە اسىرۋعا، وندىرىستەردى جەرگىلىكتەندىرۋگە جانە ونەركاسىپتىك كووپەراتسيانى دامىتۋعا قىزىعۋشىلىق ءبىلدىردى.

ايتا كەتەيىك، بۇعان دەيىن سولتۇستىك ماكەدونيا پرەزيدەنتى قاسىم-جومارت توقايەۆتىڭ ديپلوماتيالىق تاجىريبەسى مول ەەنىن ايتقان بولاتىن.