قازاقستان مەن ەستونيا زاڭ بۇزعان ازاماتتاردى جاۋاپقا تارتپاۋعا كەلىستى

بۇگىن ءماجىلىستىڭ جالپى وتىرىسىندا «قازاقستان ۇكىمەتى مەن ەستونيا ۇكىمەتى اراسىنداعى ادامداردىڭ رەادميسسياسى تۋرالى كەلىسىمدى راتيفيكاتسيالاۋ تۋرالى» زاڭى قابىلداندى، دەپ حابارلايدى Kazinform.

كەلىسىمگە استانا قالاسىندا 2022-جىلى 15- جەلتوقساندا قول قويىلعان بولاتىن. قۇجات ەكى ەلدىڭ قۇزىرەتتى ورگاندارىنىڭ رەادميسسيا ماسەلەلەرى بويىنشا ىنتىماقتاستىعىن قۇقىقتىق تۇرعىدا رەتتەيدى.

«كەلىسىم ەل اۋماعىندا بولۋى ءتارتىبىن بۇزعان ادامداردى قايتارۋ ءتارتىبىن رەتتەيدى. كەلىسىم ءبىزدىڭ ازاماتتاردى جاۋاپكەرشىلىككە تارتپاي، كىرۋگە تىيىم سالعىزباي ءتيىستى تالاپتار بويىنشا قايتارۋعا مۇمكىندىك بەرەدى»، - دەدى ىشكى ىستەر ءمينيسترى ەرجان سادەنوۆ.

سونىمەن قاتار سول مەملەكەتتىڭ قۇزىرەتتى ورگاندارى قازاقستان ازاماتىنا ەلگە ورالۋعا قاجەتتى قۇجاتتاردى راسىمدەۋگە كومەكتەسەدى. كەلىسىممەن قۇزىرلى ورگاندار رەتىندە قازاقستان جاعىنان - ىشكى ىستەر مينيسترلىگى، ال ەستونيادان پوليتسيا جانە شەكارانى قورعاۋ دەپارتامەنتى بەكىتىلدى.

«كەلىسىمدى راتيفيكاتسيالاۋ ەۋروپا مەملەكەتتەرىمەن ءوزارا ىنتىماقتاستىقتى نىعايتۋدا جاڭا سەرپىن بەرەدى. وسىنداي كەلىسىمدەرگە قول قويۋ ءبىزدىڭ ازاماتتارىمىز ءۇشىن ۆيزالىق ءتارتىپتى وڭايلاتۋعا مۇمكىندىك تۋعىزادى. اتالعان قادامدار قازان ايىندا بريۋسسەل قالاسىندا ارىپتەستەرمەن كەلىسىلگەن بولاتىن. كەلىسىم حالىقارالىق تاجىريبەنى ەسكەرە وتىرىپ ازىرلەندى. وسى كەلىسىم زاڭسىز كوشى-قونعا قارسى كۇرەس جۇرگىزۋگە مۇمكىندىك بەرەدى»، - دەدى مينيستر.