قازاقستان مەن گرۋزيا پارلامەنتارالىق ىنتىماقتاستىقتى جالعاستىرا بەرەدى
استانا. KAZINFORM - سەنات سپيكەرى ماۋلەن اشىمبايەۆ قازاقستانعا العاش رەت رەسمي ساپارمەن كەلگەن گرۋزيا پارلامەنتىنىڭ ءتوراعاسى شالۆا پاپۋاشۆيليمەن كەزدەستى. وندا تاراپتار پارلامەنتارالىق ىنتىماقتاستىقتى ودان ءارى نىعايتۋ جانە تاعى باسقا وزەكتى ماسەلەلەردى تالقىلادى.
پالاتا ءتوراعاسى گرۋزيادان كەلگەن ارىپتەسىنە ءىلتيپات ءبىلدىرىپ، بۇل ساپار پارلامەنتارالىق ءوزارا ءىس-قيمىلدى جانە مەملەكەتتەر اراسىنداعى ىنتىماقتاستىقتى ودان ءارى كەڭەيتۋگە تىڭ سەرپىن بەرەتىنىن ايتتى.
«گرۋزيا - قازاقستاننىڭ وڭتۇستىك كاۆكاز وڭىرىندەگى ماڭىزدى سەرىكتەسى. ءسىزدىڭ ساپارىڭىز ءبىزدىڭ پارلامەنتارالىق ءوزارا ءىس-قيمىلىمىزدى، سونداي-اق، ەلدەرىمىز اراسىنداعى ىنتىماقتاستىقتى ودان ءارى دامىتۋعا تىڭ سەرپىن بەرەدى دەپ سەنەمىن. سوڭعى جىلداردا ساۋدا-ەكونوميكالىق سالاسىندا بەلگىلى ءبىر ناتيجەگە قول جەتكىزدىك. بۇل ءبىزدىڭ ەكىجاقتى قارىم-قاتىناستارىمىزدىڭ درايۆەرى ەكەنى انىق. ءبىز ءتۇرلى باعىتتاعى ىنتىماقتاستىقتى نىعايتۋ جولىنداعى مىندەتتەردى ىسكە اسىرۋعا پارلامەنتتەر تاراپىنان دا ىقپال ەتە الامىز»، - دەدى ماۋلەن اشىمبايەۆ.
سونىمەن قاتار كەزدەسۋدە تۋريستىك، كولىكتىك-لوگيستيكالىق جانە باسقا دا سالالارداعى ىنتىماقتاستى ارتتىرۋ ماسەلەلەرى تالقىلاندى.
سەنات سپيكەرى مەملەكەت باسشىسىنىڭ باستاماسىمەن قازاقستاندا ىسكە اسىرىلىپ جاتقان كەشەندى الەۋمەتتىك- ەكونوميكالىق جانە ساياسي رەفورمالارعا، سونداي-اق، سەناتتىڭ زاڭ شىعارۋ قىزمەتىنە دە توقتالدى.
اتاپ ايتقاندا، جاڭا ەكونوميكالىق ۇلگى قالىپتاستىرۋعا جانە ەلدىڭ ينۆەستيتسيالىق احۋالىن جاقسارتۋعا ارنالعان شارالار تۋرالى ءسوز بولدى.
ءوز كەزەگىندە شالۆا پاپۋاشۆيلي كوپجاقتى قاتىناستى دامىتۋعا مۇددەلى ەكەنىن ءبىلدىرىپ، قازاقستانداعى ساياسي ترانسفورماتسيانىڭ تيىمدىلىگىن تىلگە تيەك ەتتى.
