قازاقستان مەن رەسەيدىڭ قارىم-قاتىناسى دوستىق پەن تاتۋ كورشىلىك داستۇرىنە سۇيەنگەن - ۆلاديمير پۋتين

استانا. KAZINFORM - رەسەي مەن قازاقستاننىڭ ىنتىماقتاستىعى بارلىق سالادا بەلسەندى تۇردە دامىپ كەلە جاتىر. بۇل تۋرالى رەسەي فەدەراتسياسىنىڭ پرەزيدەنتى ۆلاديمير پۋتين «كازاحستانسكايا پراۆدا» گازەتىندە جاريالانعان ماقالاسىندا ءمالىم ەتتى.

ونىڭ ايتۋىنشا، ەكى ەلدىڭ سەرىكتەستىگى دوستىق، تاتۋ كورشىلىك جانە ءوزارا كومەك داستۇرلەرىنە سۇيەنگەن. سونىمەن قاتار قارىم-قاتىناس ءوزارا تەڭدىك پەن مۇددەنى قۇرمەتتەۋدىڭ بەرىك قاعيداتتارىنا نەگىزدەلگەن.

«مەملەكەتارالىق بايلانىستىڭ جوعارى دەڭگەيىن قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقايەۆپەن بىرلەسكەن جۇمىس جىلدارىندا قالىپتاسقان تىعىز جانە مەيىرىمدى جەكە قاتىناستار كۋالاندىرادى. ءبىز ۇنەمى قوڭىراۋ شالىپ، ءارتۇرلى فورماتتاردا كەزدەسەمىز. ەكىجاقتى وزەكتى ماسەلەلەردى تالقىلاپ، كۇن تارتىبىندە تۇرعان وڭىرلىك جانە جاھاندىق پروبلەمالار تۋرالى پىكىر الماسامىز، كەلەشەككە جاڭا جوسپارلاردى دا بەلگىلەيمىز. ەڭ باستىسى - قازاقستان پرەزيدەنتىمەن ءارقاشان ناقتى ناتيجەگە باعدار قويامىز. رەسەي- قازاقستان ىنتىماقتاستىعىنىڭ ودان ءارى سەنىمدى دامۋى، ەلدەرىمىزدىڭ وركەندەۋى، ازاماتتاردىڭ ءومىر ءسۇرۋ ساپاسىن ارتتىرۋ ءۇشىن بارىنشا قولايلى جاعدايلاردى قامتاماسىز ەتۋ تۇرعىسىندا قولدان كەلگەننىڭ ءبارىن جاساۋعا تىرىسامىز»، - دەپ جازدى ۆ. پۋتين.

ر ف پرەزيدەنتى رەسەي - قازاقستاننىڭ ءىرى ەكونوميكالىق سەرىكتەستەرىنىڭ ءبىرى ەكەنىن اتاپ ءوتتى.

«ءبىزدىڭ مەملەكەتتەرىمىز ەۋرازيالىق ەكونوميكالىق وداق قۇرۋدىڭ باستاۋىندا تۇردى. ونىڭ اياسىندا ءبىز تاۋارلاردىڭ، كورسەتىلەتىن قىزمەتتەردىڭ ساپاسىن ارتتىرىپ، كاپيتالدىڭ ورتاق نارىعىن دامىتىپ وتىرمىز، رەتتەۋشىلىك جانە ساۋدا كەدەرگىلەرىن جويۋ بويىنشا اۋقىمدى جۇمىس اتقارىپ كەلەمىز. ورتاق كولىكتىك- لوگيستيكالىق ينفراقۇرىلىمدى دامىتۋ ءىسىن دە قولعا الدىق. مۇنىڭ ءبارى ەكونوميكانىڭ ءتۇرلى سالالارى بويىنشا ءتيىمدى ىنتىماقتاستىق ورناتۋعا مۇمكىندىك بەرەدى جانە ءبىزدىڭ ەلدەرىمىزگە ەلەۋلى پايدا اكەلەدى»، - دەپ اتالىپ وتكەن ۆ. پۋتين ماقالاسىندا.

بۇدان بۇرىن حابارلانعانداي، رەسەي فەدەراتسياسىنىڭ پرەزيدەنتى ۆلاديمير پۋتين قازاقستان رەسپۋبليكاسىنا كەزەكتى مەملەكەتتىك ساپارى اياسىندا ەلىمىزدىڭ بەدەلدى باسىلىمدارىنىڭ ءبىرى - «كازاحستانسكايا پراۆدا» گازەتىنە ماقالا جاريالاپ، ەكى ەل اراسىنداعى ىنتىماقتاستىق تۋرالى ويىن جەتكىزدى.

اۆتور
رۋسلان عابباسوۆ