قازاقستان مەن رەسەيدىڭ قارىم- قاتىناسى - بەرىك ءارى مىزعىماس دوستىقتىڭ شىنايى كورىنىسى - توقايەۆ
استانا. KAZINFORM — قازاقستان مەن رەسەيدىڭ قارىم- قاتىناسى - بەرىك ءارى مىزعىماس دوستىقتىڭ شىنايى كورىنىسى. بۇل تۋرالى قازاقستان پرەزيدەنتى قاسىم- جومارت توقايەۆ رەسەيدە شىعاتىن «يزۆەستيا» گازەتىنە جاريالانعان ماقالاسىندا جازدى.
«قازاقستان مەن رەسەيدىڭ قارىم- قاتىناسى - بەرىك ءارى مىزعىماس دوستىقتىڭ شىنايى كورىنىسى. ەكى ەلدىڭ ستراتەگيالىق سەرىكتەستىگى مەن وداقتاستىعى تىعىز استاسىپ جاتقان تاريحي جانە مادەني بايلانىستارعا، سونداي- اق، قوس حالىقتىڭ بولاشاعىنا قاتىستى ورتاق جاۋاپكەرشىلىككە نەگىزدەلگەن. بۇرىن- سوڭدى بولماعان جاھاندىق سىن- قاتەرلەرگە قاراماستان، ءبىزدىڭ ەلدەرىمىز تاتۋ كورشىلىك پەن سان سالالى ىنتىماقتاستىقتىڭ ۇلگىسىن كورسەتىپ كەلەدى. بۇل ىنتىماقتاستىققا ورتاق مۇددە، ءوزارا سىيلاستىق، ەڭ جوعارى دەڭگەيدەگى سىندارلى ساياسي ديالوگ ارقاۋ بولىپ وتىر. رەسەي پرەزيدەنتى ۆلاديمير ۆلاديميروۆيچ پۋتين ەكەۋمىز ۇنەمى حابارلاسىپ وتىرامىز. ءبىر- بىرىمىزگە دەگەن قۇرمەتكە نەگىزدەلگەن ءبىزدىڭ قارىم- قاتىناسىمىز ەمەن- جارقىندىعىمەن جانە ىسكەرلىك سيپاتىمەن ەرەكشەلەنەدى. مۇنداي تىعىز بايلانىس تۋىنداعان ماسەلەلەردى جەدەل شەشۋگە جانە مەملەكەتتەرىمىزدىڭ اراسىنداعى شىنايى دوستىق قاتىناستى نىعايتا تۇسۋگە مۇمكىندىك بەرەدى. سوڭعى ءبىر جىلدىڭ وزىندە رەسەي پرەزيدەنتى ەكەۋىمىز تولىققاندى فورماتتا ءتورت كەلىسسوز جۇرگىزدىك. حالىقارالىق ءىس- شارالار اياسىندا بىرنەشە مارتە كەزدەستىك، تەلەفونمەن دە ءجيى سويلەستىك» ، - دەپ اتاپ وتەدى مەملەكەت باسشىسى.
قاسىم- جومارت توقايەۆ قازاقستان مەن رەسەيدىڭ ساۋدا- ەكونوميكا سالاسىنداعى ىقپالداستىعى تۇراقتى تۇردە دامىپ كەلە جاتقانىنا نازار اۋدارتادى.
«بۇعان ەكى ەلدىڭ ۇكىمەتتەرى مەن بيزنەس وكىلدەرىنىڭ كۇش- جىگەرىن جۇمىلدىرعانىنىڭ ارقاسىندا قول جەتكىزدىك. قازىر قازاقستاندا رەسەيدىڭ 23 مىڭ كومپانياسى تابىستى جۇمىس ىستەپ جاتىر. ونىڭ 4 مىڭى سوڭعى ءبىر جىلدىڭ ىشىندە قۇرىلدى. ءبىزدىڭ ىنتىماقتاستىعىمىزدىڭ قارقىنى جوعارى ەكەنى وسىدان- اق ايقىن كورىنەدى» - دەدى پرەزيدەنت.
مەملەكەت باسشىسىنىڭ اتاپ وتۋىنشە، ەكىجاقتى ينۆەستيتسيا كولەمى دە ۇلعايا ءتۇستى. 2023 -جىلى رەسەي كومپانيالارى قازاقستانعا 3 ميلليارد دوللاردان استام ينۆەستيتسيا سالدى. قازاقستان دا رەسەي ەكونوميكاسىنا وسىنشا مولشەردە قارجى قۇيدى.
«ەلدەرىمىز بيزنەس جۇرگىزۋگە قولايلى ورتا قالىپتاستىرىپ، ينۆەستورلاردى قولداۋعا قاجەتتى بارلىق جاعدايدى جاساپ وتىر. قازاقستان مەن رەسەي ەنەرگەتيكا، ونەركاسىپ، كولىك- لوگيستيكا، اۋىل شارۋاشىلىعى جانە باسقا دا كوپتەگەن سالادا بىرلەسىپ، اۋقىمدى جۇمىس جۇرگىزىپ كەلەدى. وسىعان دەيىن جالپى قۇنى 18 ميلليارد دوللاردان اساتىن 90 نان استام جوبا ىسكە قوسىلدى. ءقازىر دە بولاشاعى زور 49 جوبا جۇزەگە اسىرىلىپ جاتىر. وسى ماڭىزدى جوبالاردىڭ ىشىنەن قازاقستاندا 3 جىلۋ ەلەكتر ورتالىعىنىڭ قۇرىلىسى باستالعانىن جانە ەكىباستۇز گ ر ە س- ءىن جاڭعىرتۋ جۇمىستارىن اتاپ وتۋگە بولادى. بۇل قاتاردا ەلىمىزدىڭ ءبىرقاتار ايماعىن گازبەن قامتاماسىز ەتۋگە، سونداي- اق، وڭتۇستىك جانە شىعىس باعىتقا تاسىمالداناتىن رەسەي ەنەرگەتيكا رەسۋرستارىنىڭ كولەمىن ارتتىرۋعا قاتىستى اۋقىمدى باستامالار دا بار»، - دەدى قاسىم- جومارت توقايەۆ.
اۆتور
مارلان جيەمباي
