قازاقستان مەن رەسەي پرەزيدەنتتەرىنىڭ مالىمدەمەسىندە كاسپي قۇبىرى كونسورتسيۋمى جۇمىسىنىڭ تۇراقتىلىعى اتالدى

استانا. KAZINFORM - قازاقستان پرەزيدەنتى قاسىم-جومارت توقايەۆ پەن رەسەي پرەزيدەنتى ۆلاديمير پۋتيننىڭ مالىمدەمەسىنىڭ ءماتىنى بۇگىن اقوردا سايتىندا جاريالاندى. كاسپي قۇبىرى كونسورتسيۋمى تۋرالى پۋنكت ەكونوميكالىق ىنتىماقتاستىق بولىمىندە جاريالانعان.

رەسەي پرەزيدەنتىنىڭ قازاقستانعا مەملەكەتتىك ساپارىنىڭ قورىتىندىسى بويىنشا جاسالعان بىرلەسكەن مالىمدەمە جاڭا جاھاندىق ءتارتىپ جاعدايىندا ستراتەگيالىق ارىپتەستىكتى تەرەڭدەتۋگە ارنالعان. وسى ورايدا، قارىم-قاتىناستىڭ نەگىزگى باعىتتارى مالىمدەمەنىڭ «ساياسي ديالوگ»، «ەكونوميكالىق ىنتىماقتاستىق»، «مادەني-گۋمانيتارلىق بايلانىستار» بولىمىندە قامتىلعان.

اتاپ ايتقاندا، ەكونوميكالىق ىنتىماقتاستىق سالاسىندا تاراپتار نەعۇرلىم ءادىل، تەڭدەستىرىلگەن جانە اشىق حالىقارالىق ساۋدا جۇيەسىن قالىپتاستىرۋعا مۇددەلىلىك تانىتاتىنىن كەلىستى. ءبىرجاقتى شەكتەۋ شارالارىن قولدانۋ حالىقارالىق ساۋدا-ەكونوميكالىق ىنتىماقتاستىققا جانە مەملەكەتتەردىڭ تۇراقتى دامۋىنا تەرىس اسەر ەتەتىنىن، كوپجاقتى ساۋدانىڭ اشىق جانە كەمسىتىلمەيتىن جۇيەسىنىڭ جۇمىس ىستەۋىنە ىقپال ەتپەيتىنىن راستادى.

«تاراپتار ۇلتتىق ۆاليۋتالارداعى ەكىجاقتى ترانزاكتسيالار ۇلەسىنىڭ ۇلعايۋىن قولدايدى، بۇل ۇزاق مەرزىمدى پەرسپەكتيۆادا ەكى ەلدىڭ قارجىلىق ەگەمەندىگىن نىعايتۋعا ىقپال ەتەدى»، - دەلىنگەن بىرلەسكەن مالىمدەمەدە.

سونىمەن قاتار وندا ەۋرازيالىق ەكونوميكالىق وداق اياسىنداعى ىنتىماقتاستىق ماسەلەسى قامتىلعان. بۇل تۇرعىدا تاراپتار ەاەو ينتەگراتسيالىق الەۋەتىن اشۋ جانە ۇلتتىق ەكونوميكالاردىڭ باسەكەگە قابىلەتتىلىگىن ارتتىرۋ ارقىلى وداق شەڭبەرىندەگى ورتاق نارىقتاردى ودان ءارى دامىتۋدىڭ ماڭىزدىلىعىن اتاپ ءوتتى.

بۇدان بولەك، مالىمدەمەدە ءوڭىردىڭ ەنەرگەتيكالىق قاۋىپسىزدىگىنە قاتىستى ەكپىن قويىلعان.

«تاراپتار ءوڭىردىڭ ەنەرگەتيكالىق قاۋىپسىزدىگى مەن تۇراقتىلىعىن قامتاماسىز ەتۋدەگى، سونداي- اق ەلدەر اراسىنداعى ەكونوميكالىق ىنتىماقتاستىقتى دامىتۋداعى شەشۋشى ءرول اتقاراتىن كاسپيي قۇبىر كونسورتسيۋمىنىڭ تۇراقتى جۇمىسىن اتاپ وتەدى»، - دەپ اتالىپ وتكەن قۇجاتتا.

وسى ارقىلى ەلىمىزدىڭ مۇنايىن سىرتقى شىعاراتىن كاسپي قۇبىر كونسورتسيۋمى جۇيەسىنىڭ توقتاۋسىز جۇمىس ىستەۋىنە جوعارى دەڭگەيدە كەپىلدىك بەرىلگەن.

جاقىندا Kazinform تىلشىسىنە بەرگەن سۇحباتىندا ساراپشى ابزال نارىمبەتوۆ قازاقستاننىڭ مۇناي ەكسپورتتاۋعا قاتىستى پىكىر ايتتى.

«ءبىزدىڭ ەكسپورتتىڭ %98 رەسەي اۋماعى ارقىلى وتەدى. ەگەر بۇل مارشرۋتتار بويىنشا ترانزيت توقتاتىلسا، قازاقستان ەكونوميكاسى اۋىر جاعدايعا تاپ بولادى»، - دەيدى ول.

مۇنىمەن قوسا، بىرلەسكەن مالىمدەمەدە گاز سالاسىنداعى، ونىڭ ىشىندە گازدى ءۇشىنشى ەلدەرگە تاسىمالداۋ ماقساتىندا ارىپتەستىكتى ودان ءارى كەڭەيتۋگە مۇددەلىلىك بار ەكەنى حابارلانعان.

«بىرلەسكەن جوبالاردى ىسكە اسىرۋ ورتالىق ازيانىڭ وڭىرلىك تۇراقتىلىعى مەن ەنەرگەتيكالىق قاۋىپسىزدىگىن نىعايتادى، قازاقستان مەن رەسەيدىڭ ونەركاسىپتىك دامۋىنا، بيزنەس-احۋالدى جاقسارتۋعا، ازاماتتاردىڭ ءومىر ءسۇرۋ دەڭگەيىن ارتتىرۋعا قۋاتتى سەرپىن بەرەدى»، - دەلىنگەن مالىمدەمە ماتىنىندە.

بۇدان بۇرىن حابارلانعانداي، مەملەكەت باسشىسى قاسىم-جومارت توقايەۆتىڭ شاقىرۋىمەن 27-قاراشا كۇنى ەلىمىزگە رەسەي فەدەراتسياسىنىڭ پرەزيدەنتى ۆلاديمير پۋتين مەملەكەتتىك ساپارمەن كەلدى.

ساپار اياسىندا جوعارى دەڭگەيدەگى كەلىسسوزدەر جۇرگىزىلدى. مەملەكەت باسشىلارى قازاقستان مەن رەسەيدىڭ ⅹⅹ ءوڭىرارالىق ىنتىماقتاستىق فورۋمىنا بەينەكونفەرەنسيا رەجيمى ارقىلى قاتىستى.

سونداي-اق 28-قاراشا كۇنى قازاقستان پرەزيدەنتى قاسىم-جومارت توقايەۆتىڭ توراعالىعىمەن ۇ ق ش ۇ ۇجىمدىق قاۋىپسىزدىك كەڭەسىنىڭ كەزەكتى سەسسياسى باستالدى.

جيىنعا قازاقستان پرەزيدەنتى قاسىم-جومارت توقايەۆ، بەلارۋس پرەزيدەنتى الەكساندر لۋكاشەنكو، قىرعىزستان پرەزيدەنتى سادىر جاپاروۆ، تاجىكستان پرەزيدەنتى ەمومالي راحمون جانە رەسەي پرەزيدەنتى ۆلاديمير پۋتين، ۇ ق ش ۇ باس حاتشىسى يمانعالي تاسماعامبەتوۆ قاتىسىپ وتىر. جيىندا ايماقتىق جانە حالىقارالىق قاۋىپسىزدىكتىڭ نەگىزگى ماسەلەلەرى تالقىلانادى.

وتىرىس قورىتىندىسى بويىنشا ءبىرقاتار قۇجاتقا قول قويىلادى.