قازاقستان مەن رەسەي پرەزيدەنتتەرى اقتاۋ ماڭىنداعى ۇشاق اپاتىنىڭ ءمان-جايىن انىقتاۋ جۇمىستارىن تالقىلادى
استانا. KAZINFORM - رەسەي تاراپىنىڭ باستاماسىمەن قاسىم-جومارت توقايەۆ پرەزيدەنت ۆلاديمير پۋتينمەن تەلەفون ارقىلى سويلەستى. بۇل تۋرالى اقوردانىڭ باسپا ءسوز قىزمەتى حابارلادى.
پرەزيدەنتتەر اقتاۋ قالاسىنىڭ ماڭىندا Azerbaijan Airlines كومپانياسى ۇشاعىنىڭ اپاتقا ۇشىراپ، قازاقستان جانە رەسەي ازاماتتارىنىڭ قازا تابۋىنا بايلانىستى ءبىر- بىرىنە كوڭىل ايتىپ، زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك ءبىلدىردى.
قاسىم-جومارت توقايەۆ پەن ۆلاديمير پۋتين اپات سەبەپتەرىن انىقتاۋ ءۇشىن تاراپتاردىڭ اتقارىپ جاتقان جۇمىستارىن تالقىلادى. مەملەكەت باسشىسى قازاقستان رەسپۋبليكاسىنىڭ ۇكىمەتتىك كوميسسياسى تەرگەۋ ءىسىن ازەربايجان، رەسەي جانە برازيليا ەلدەرىنىڭ ماماندارىن تارتا وتىرىپ جۇرگىزىپ جاتقانىن ايتتى.
پرەزيدەنتتەر تەرگەۋ امالدارىن جان-جاقتى جانە اشىق جۇرگىزۋدىڭ ماڭىزدى ەكەنىن اتاپ ءوتتى.
ايتا كەتەيىك، پرەزيدەنت ماڭعىستاۋ وبلىسىندا بولعان ۇشاق اپاتىنان قازاقستان ازاماتتارى دا قازا تاپقانىنا توقتالىپ، مارقۇمداردىڭ وتباسى مەن جاقىندارىنا تاعى دا كوڭىل ايتتى.
