قازاقستان مەن رەسەيگە قاتىستى فەيك اقپارات جيىلەدى – س ءى م

استانا. KAZINFORM - سىرتقى ىستەر مينيسترلىگىنىڭ رەسمي وكىلى ايبەك سمادياروۆ قازاقستان مەن رەسەيگە قاتىستى فەيك اقپاراتتار جيىلەپ كەتكەنىن ايتتى.

«كەيىنگى كەزدەرى قازاقستانعا قاتىستى اقپاراتتىق شابۋىل كوبەيىپ كەتتى. ارينە، ونىڭ ءبارى قازاقستان مەن رەسەيدىڭ اراسىنداعى دوستىق قارىم-قاتىناستى بۇزۋعا باعىتتالعان. ماسەلەن، تاتارستانداعى وبەكتىلەردى قازاقستاننان ۇشىرىلعان دروندار اتقىلادى دەگەن قاۋەسەت بولدى. وعان قوسا، قازاقستان رەسەيدىڭ قارۋ-جاراعىن ۋكرايناعا ساتىپ جاتىر دەگەن اقپارات جاريالاندى. مۇنىڭ ءبارى جالعان مالىمەت. ونى بىردەن قازاقستاننىڭ قورعانىس مينيسترلىگى وسىنىڭ ءبارىن جالعان اقپارات ەكەنىن جاريالادى. ءبىز مۇنداي اقپاراتتىق شابۋىلعا قارسى رەسەيلىك تاراپپەن بىرلەسىپ، جۇمىس ىستەپ جاتىرمىز. بارلىق دەڭگەيدە بايلانىس ورناتىلعان»، - دەدى ا. سمادياروۆ ۆەدومستۆوداعى اپتالىق باسپا ءسوز ءماسليحاتىندا.

بۇل تۇرعىدا ول «ءۇشىنشى كۇشتەر» جالعان مالىمەتتەردى پايدالانىپ، وزدەرىنىڭ ارەكەتتەرىن ىستەپ جاتقانىن ايتتى.

«وسىدان 2 كۇن بۇرىن جاساندى ينتەللەكتىنى پايدالانىپ، مەملەكەتتىك دۋمانىڭ دەپۋتاتى اندرەي گۋرۋلەۆتىڭ داۋىسىمەن قازاقستانعا قارسى تاعى جامان سوزدەر ايتقىزدى. بۇل دەپۋتات الەۋمەتتىك جەلىلەردە ۆيدەو ءتۇسىرىپ، بۇل اقپاراتتىڭ جالعان ەكەنىن مالىمدەدى. وسىنىڭ ءبارىن ەسكەرىپ، ءبىز رەسەيدىڭ بارلىق دەڭگەيدەگى مەملەكەتتىك ورگاندارىمەن تىكەلەي بايلانىس ورناتتىق. سونىڭ ارقاسىندا ءبىز جاعىمسىز ارەكەتتەرگە ءتيىمدى قارسى تۇرا الامىز. وسىعان بايلانىستى بارلىق ازامات پەن ب ا ق وكىلىنە تەك رەسمي اقپارات كوزدەرىنە سەنۋگە، پايدالانۋعا شاقىرامىز»، - دەدى رەسمي وكىل.

بۇدان بۇرىن حابارلانعانداي، جاقىندا ق ر قورعانىس مينيسترلىگى تاتارستاننىڭ ەلابۋگا جانە نيجنەكامسك قالالارىنداعى كاسىپورىندارعا جاسالعان درون شابۋىلىنا قازاقستاننىڭ قاتىسى جوق ەكەنىن مالىمدەدى.