قازاقستان مەن رەسەي شەكاراسىندا كەپتەلىس بولۋى مۇمكىن - كوميتەت تۇسىنىكتەمە بەردى
استانا. KAZINFORM - مەملەكەتتىك كىرىستەر كوميتەتى سىرتقى ەكونوميكالىق قىزمەتكە قاتىسۋشىلار مەن تاسىمالداۋشىلاردى ىرگەلەس مەملەكەتتىڭ اۋماعىندا الداعى جوندەۋ جۇمىستارى تۋرالى حاباردار ەتتى.
ورىنبور وبلىسى بويىنشا رەسەي فەدەراتسياسىنىڭ ف ق ق شەكارا باسقارماسىنىڭ رەسمي اقپاراتىنا سايكەس:
1. 2025-جىلعى 19-29-مامىر ارالىعىندا «ماشتاكوۆو» اۆتوكولىك وتكىزۋ پۋنكتىندە (رەسەي فەدەراتسياسىنان قازاقستان رەسپۋبليكاسىنا شىعۋ باعىتى) ينسپەكسيالىق-تەكسەرۋ كەشەنىنىڭ نەگىزىن قالپىنا كەلتىرۋ بويىنشا جوندەۋ جۇمىستارى جۇرگىزىلەدى.
2. سونداي-اق 2025-جىلعى 19-مامىر مەن 30-قاراشا ارالىعىندا رەسەي فەدەراتسياسىنىڭ ۋاكىلەتتى ورگاندارى «تەپلوە» ەكىجاقتى اۆتوكولىك وتكىزۋ پۋنكتىنىڭ اۋماعىندا جول توسەمىن جوندەۋ جۇمىستارىن جوسپارلاپ وتىر.
- جوندەۋ ءىس-شارالارىن جۇرگىزۋ كەزەڭىندە وتكىزۋ پۋنكتتەرىنىڭ جۇمىسى شتاتتىق رەجيمدە جۇزەگە اسىرىلادى. ولاردىڭ جۇمىس ىستەۋ تارتىبىنە وزگەرىستەر ەنگىزۋ كوزدەلمەگەن. سونىمەن قاتار «سىرىم» جانە «تاسقالا» قازاقستاندىق وتكىزۋ پۋنكتتەرىنىڭ ماڭىندا كولىك قۇرالدارىنىڭ قوزعالىسىنا ۋاقىتشا قيىندىقتار تۋىنداۋى جانە كەپتەلىستەر بولۋى مۇمكىن، - دەلىنگەن حابارلامادا.
وسىعان بايلانىستى مەملەكەتتىك كىرىستەر كوميەتى تاسىمالداۋشىلارعا مارشرۋتتاردى الدىن الا جوسپارلاۋدى جانە مۇمكىندىگىنشە مەملەكەتتىك شەكارادان ءوتۋ كەزىندە بالاما باعىتتاردى پايدالانۋدى قاپەرگە سالدى.
ەسكە سالا كەتەيىك، بۇعان دەيىن وزبەك تاراپى قازاقستان، رەسەي جانە ازەربايجان ازاماتتارىن شەكارادان جەكە كۋالىكپەن وتكىزۋ ءتارتىبىن ەنگىزۋ مۇمكىندىگىن قاراستىرىپ جاتقانىن جازعان ەدىك.
