قازاقستان مەن رەسەي شەكاراداعى وزەندەردە سۋ تاسقىنىنا دايىندالىپ جاتىر
استانا. KAZINFORM - سۋ تاسقىنىن بولجاۋ جانە الدىن الۋ ءۇشىن ەلىمىزدىڭ توتەنشە جاعدايلار مينيسترلىگى جانىنداعى رەسپۋبليكالىق داعدارىس ورتالىعى رەسەيدىڭ توتەنشە جاعدايلار مينيسترلىگىنىڭ داعدارىس جاعدايداعى ۇلتتىق باسقارۋ ورتالىعىمەن ترانسشەكارالىق وزەندەردەگى سۋ دەڭگەيىنىڭ جاي-كۇيى تۋرالى تۇراقتى اقپارات الماسۋدا.

قازىر تاسقىنعا قارسى ينفراقۇرىلىمدى نىعايتۋ جانە تاۋەكەلدى ازايتۋعا باعىتتالعان جۇمىستار ىستەلىپ جاتىر. نەگىزگى ءىس-شارالاردىڭ قاتارىندا بوگەتتەر سالۋ جانە نىعايتۋ، سۋدى بۇرۋ ارنالارى مەن ارىقتار قازۋ، سونداي-اق سۋدى وتكىزۋ قۇرىلىستارى مەن كارىز جۇيەسىن جوندەۋ جۇمىستارى بار. الايدا، ساراپشىلاردىڭ پىكىرىنشە، رەسەي فەدەراتسياسىمەن شەكارانى كەسىپ وتەتىن وزەندەردە بوگەتتەر بۇزىلعان نەمەسە سۋ دەڭگەيى كۇرت كوتەرىلگەن جاعدايدا، اتقارىلعان جۇمىستار جەتكىلىكسىز بولۋى مۇمكىن.
وسى ورايدا ەلىمىزدىڭ توتەنشە جاعدايلار مينيسترلىگى سۋ تاسقىنىنىڭ الدىن الۋدا ۋاكىلەتتى ورگاندار مەن ۇيىمداردى ءتيىمدى باسقارۋ جانە ءوزارا ءىس-قيمىل جاساۋ ءۇشىن جاھاندىق جانە وڭىرلىك اۋقىمداعى توتەنشە جاعدايلاردى جويۋ جونىندەگى ءىس-قيمىل جوسپارى ازىرلەنىپ، بەكىتىلگەنىن حابارلاپ وتىر.
- ەلىمىزدىڭ توتەنشە جاعدايلار مينيسترلىگى، وڭىرلىك توتەنشە جاعدايلار دەپارتامەنتتەرىمەن بىرلەسىپ رەسەيدىڭ توتەنشە جاعدايلار مينيسترلىگىنىڭ داعدارىس جاعدايىندا باسقارۋ ورتالىقتارىمەن تۇراقتى نەگىزدە اقپاراتتىق ءوزارا ءىس-قيمىلدى جۇزەگە اسىرادى. ونىڭ ىشىندە ترانسشەكارالىق وزەندەردەگى سۋ دەڭگەيى مەن گيدروتەحنيكالىق قۇرىلىستاردىڭ جاي-كۇيى جانە اۋا رايىنىڭ وزگەرۋى تۋرالى اقپارات الماسادى، - دەلىنگەن اگەنتتىك جولداعان ساۋال جاۋابىندا.
وسىلايشا، ەلىمىزدىڭ توتەنشە جاعدايلار مينيسترلىگى تاسقىن بولجامىنا قاتىستى دەرەكتەردى تالداي وتىرىپ، الدىن الۋ، جەدەل دەن قويۋ شارالارىن قاراستىرىپ جاتىر.
ايتا كەتسەك، بۇگىندە ەلىمىزدىڭ بارلىق سۋ قويمالارى سۋ تاسقىنى كەزەڭىنە دايىندالۋدا.
سونىمەن قاتار وڭىرلەردە سۋ تاسقىنىنىڭ الدىن الۋعا قاتىستى قانداي جۇمىس اتقارىلىپ جاتقانىن حابارلاعان ەدىك.