قازاقستان مەن گەرمانيا عىلىم مەن ءبىلىم سالالارىندا تىعىز ىنتىماقتاستىق ورناتادى

«TALAP» قولدانبالى زەرتتەۋلەر ورتالىعىنىڭ ساراپشىسى ەرىك باتىرحانوۆ مەملەكەت باسشىسى قاسىم-جومارت توقايەۆتىڭ گەرمانياعا ساپارىنا وراي پىكىر ءبىلدىردى، دەپ حابارلايدى قازاقپارات ءتىلشىسى.

Фото: akorda.kz
Фото: из открытых источников

«قازاقستان پرەزيدەنتى قاسىم-جومارت توقايەۆتىڭ گەرمانياعا ساپارى وتە ماڭىزدى ەكەندىگىن اتاپ وتكىم كەلەدى. حالىقارالىق قارىم-قاتىناستا ءتۇرلى دەڭگەيدەگى ءالۋانتۇرلى ساپارلاردىڭ بار ەكەنى بەلگىلى. ال بۇل - مەملەكەت باسشىمىزدىڭ رەسمي ساپارى. پرەزيدەنتىمىزدى ۇشاق باسقىشىنان قاراۋىل قارسى الدى. ياعني، بۇل كەزدەسۋدىڭ قانشالىقتى جوعارى دەڭگەيدە وتەتىندىگىن بىلدىرەدى. وسى جىلدىڭ ماۋسىمىندا گەرمانيانىڭ فەدەرالدى پرەزيدەنتى فرانك-ۆالتەر شتاينمايەر قازاقستانعا ساپارلاعانىن ايتا كەتكەن ءجون. ول دا جوعارى دەڭگەيدەگى ساپار بولدى»، - دەدى ول اگەنتتىك تىلشىسىنە.

ساراپشى قازاقستان پرەزيدەنتىنىڭ ساپارى ورتالىق ازيا ەلدەرى جانە گەرمانيا باسشىلارىنىڭ كەزدەسۋى قارساڭىندا ءوتىپ جاتقانىنا نازار اۋدارتتى.

ونىڭ ايتۋىنشا، گەرمانيادا تەحنولوگيا، ونەركاسىپ، كەن ءوندىرۋ وتە جاقسى دامىعان. ال مەملەكەت باسشىسى قاسىم-جومارت توقايەۆ ەلىمىزدە سيرەك كەزدەسەتىن مەتالداردى بارلاۋ قاجەتتىگىن بىرنەشە مارتە اتاپ ءوتتى.

«ال ول تەك شىعىندى عانا ەمەس سونىمەن قاتار تەحنولوگيالاردى دا قاجەت ەتەدى. وسىعان وراي بۇل باعىتتا دا اڭگىمە بولادى دەپ ويلايمىن. ەلىمىزدىڭ اۋماعىندا پايدالى قازبالاردى بارلاعانى، وندىرگەنى ءۇشىن ونىڭ ورنىنا تەحنولوگيا الامىز. مەنىڭ بىلۋىمشە، كەن جەرىمىزدە ءوندىرىلىپ قانا قويماي وڭدەلۋى ءۇشىن كەلىسسوز جۇرگىزىلەدى. ال بۇل تەحنولوگيا مۇلدەم باسقا، بارىنشا كۇردەلى پروتسەس»، - دەدى ساراپشى.

ەرىك باتىرحانوۆتىڭ اتاپ وتۋىنشە، قازاقستان مەن گەرمانيا شيكىزات نەگىزىندە عانا ىنتىماقتاستىقتى جول قويمايدى. ساۋدا-ەكونوميكالىق ىنتىماقتاستىق جونىندەگى ۇكىمەتارالىق جۇمىس توبى جۇمىس ىستەيدى. ينۆەستيتسيا سالاسىنداعى ىنتىماقتاستىقتى نىعايتۋ جونىندەگى جۇمىس توبى - بەرلين ەۋرازيالىق كلۋبى بار.

«ياعني، ەلدەرىمىز اراسىنداعى ءوزارا ءىس-قيمىل ءۇشىن وتە كوپ الاڭ بار. ءبىلىم سالاسىن ايتار بولساق، ەسەنوۆ اتىنداعى كاسپيي تەحنولوگيا جانە ينجەنەريا ۋنيۆەرسيتەتى بازاسىندا قازاقستان- نەمىس تۇراقتى ينجەنەريا ينستيتۋتى اشىلدى. سونىمەن قاتار شىعىس قازاقستان تەحنيكا ۋنيۆەرسيتەتىنىڭ بازاسىندا قازاقستان-نەمىس عىلىم جنە تەحنولوگيا ينستيتۋتىن اشۋ جوسپارلانعان. ياعني، عىلىم، ءبىلىم سالالارىندا تىعىز ىنتىماقتاستىق ءجۇرىپ جاتىر. مەنىڭشە، گەرمانيا - ەۋروپالىق قۋاتتى مەملەكەتتەردىڭ ءبىرى. ەۋروپالىق وداقتاعى كۇردەلى گەوساياسي احۋالدى ەسكەرەر بولساق، گەرمانيا ورتالىق ازياعا قايتادان اشىلادى جانە قازاقستان تاعى دا كوشباسى بولادى»، - دەدى ول.

سوڭعى جاڭالىقتار