قازاقستان مەن گەرمانيا اراسىندا ءوزارا سەنىم بار - قاسىم-جومارت توقايەۆ

استانا. KAZINFORM - قازاقستان مەن گەرمانيا اراسىندا ءوزارا سەنىم بار، بەرىك دوستىق قاتىناس ورناعان. بۇل تۋرالى اقوردادا ەلىمىزگە رەسمي ساپارمەن كەلگەن گەرمانيانىڭ فەدەرالدىق كانتسلەرى ولاف شولتسپەن كەڭەيتىلگەن قۇرامداعى كەلىسسوز بارىسىندا مەملەكەت باسشىسى قاسىم-جومارت توقايەۆ ايتتى.

«شاقىرۋىمدى قابىل العانىڭىز ءۇشىن شىنايى ريزاشالىعىمدى بىلدىرەمىن. بۇل ءسىزدىڭ قازاقستانعا جاساعان العاشقى رەسمي ساپارىڭىز. ءبىز بۇعان ايرىقشا ءمان بەرەمىز. بۇگىنگى كەزدەسۋ قازاقستان مەن گەرمانيانىڭ كوپقىرلى ىقپالداستىعىن جاڭا بەلەسكە كوتەرەدى دەپ سەنەمىن. سەبەبى، ەلدەرىمىزدىڭ اراسىندا ءوزارا سەنىم بار، بەرىك دوستىق قاتىناستار ورناعان»، - دەپ اتاپ ءوتتى مەملەكەت باسشىسى.

پرەزيدەنت جاڭا عانا وتكەن شاعىن قۇرامداعى كەلىسسوز بارىسىندا ەكىجاقتى قارىم-قاتىناستى ودان ارى نىعايتۋ ماسەلەلەسى تالقىلانعانىن ايتتى.

«ساۋدا، ەكونوميكا، ينۆەستيتسيا سالاسىنداعى ىقپالداستىقتى تەرەڭدەتۋگە ەرەكشە نازار اۋداردىق. بۇدان بولەك، وزەكتى حالىقارالىق ماسەلەلەر تۋرالى ءسوز قوزعادىق. اسىرەسە، قازىرگى گەوساياسي احۋالعا، جاھاندىق قاۋىپسىزدىككە جانە ايماقتىق دامۋعا، كليماتتىڭ وزگەرۋىنە قاتىستى پىكىر الماستىق. سونداي-اق حالىقارالىق ۇيىمدار اياسىنداعى بايلانىستارعا توقتالدىق. ەكىجاقتى قارىم-قاتىناسىمىز ستراتەگيالىق سەرىكتەستىك رۋحىندا دامىپ كەلە جاتىر. كەڭەيتىلگەن قۇرامداعى كەلسسوزدەر ونىڭ اياسىن كەڭەيتە تۇسۋگە ىقپال ەتەدى دەپ سەنەمىن»، - دەدى قاسىم-جومارت توقايەۆ.

وسىعان دەيىن مەملەكەت باسشىسى قاسىم-جومارت توقايەۆ استاناعا رەسمي ساپارمەن كەلگەن گەرمانيانىڭ فەدەرالدىق كانتسلەرى ولاف شولتس اقوردادا قارسى العانىن جازدىق.