قازاقستان مەن رۋاندا پرەزيدەنتتەرى ءبىرقاتار سالاداعى قارىم-قاتىناستى دامىتۋ ماسەلەسىن تالقىلادى

استانا. قازاقپارات - اقوردادا مەملەكەت باسشىسى قاسىم-جومارت توقايەۆ رۋاندا پرەزيدەنتى پول كاگامەمەن كەلىسسوز جۇرگىزدى.

كەزدەسۋ بارىسىندا قاسىم-جومارت توقايەۆ پول كاگامەگە ءىلتيپات ءبىلدىرىپ، بۇل ساپاردىڭ تاريحي ءمانى زور دەپ باعالادى. سونداي-اق قازاقستان مەن رۋاندا اراسىنداعى قارىم-قاتىناس جاڭا دەڭگەيگە شىعاتىنىن جەتكىزدى.

- ءسىزدىڭ بۇل ساپارىڭىز جانە الداعى كەلىسسوزدەر ەكىجاقتى ىقپالداستىققا تىڭ سەرپىن بەرۋ تۇرعىسىنان وتە ماڭىزدى دەپ ويلايمىن. رۋاندانىڭ ەكونوميكاسى قارقىندى دامىپ كەلەدى. مەنىڭشە، ءوزارا بايلانىستاردى نىعايتا بەرۋ قاجەت. ويتكەنى قازاقستان - ءى ج ءو كولەمى، ءىت تەحنولوگيالار مەن جاساندى ينتەللەكتىنى دامىتۋ بويىنشا وڭىردەگى كوشباسشى ەل. بۇل ءبىزدىڭ ءوزارا ءتيىمدى ىنتىماقتاستىعىمىزدى وركەندەتۋدىڭ باسىم باعىتتارى بولا الادى. سوندىقتان ءسىزدىڭ ساپارىڭىزعا ەرەكشە ءمان بەرەمىن، - دەدى قاسىم-جومارت توقايەۆ.

رۋاندا پرەزيدەنتى مەملەكەت باسشىسىنا قوناقجايلىق تانىتقانى ءۇشىن العىس ايتىپ، ەكىجاقتى ىنتىماقتاستىقتى دامىتۋعا نيەتتى ەكەنىن جەتكىزدى.

- ەلىڭىزگە شاقىرعانىڭىز ءۇشىن ريزاشىلىعىمدى بىلدىرەمىن. مەن بۇعان دەيىن قازاقستانعا 2015 -جىلى كەلگەن بولاتىنمىن، بۇل مەنىڭ ەكىنشى ساپارىم. وزىڭىزبەن جانە ءسىزدىڭ كومانداڭىزبەن بىرگە ەكى ەل يگىلىگى جولىنداعى بىرلەسكەن جۇمىسىمىزدى جالعاستىرۋدىڭ مۇمكىندىكتەرىن قاراستىرامىز، - دەدى پول كاگامە.

تاراپتار قازاقستان مەن رۋاندانىڭ ساياسي، ساۋدا-ەكونوميكالىق، كولىك-لوگيستيكا، اۋىل شارۋاشىلىعى جانە سيفرلاندىرۋ سالالارىنداعى قارىم-قاتىناستارىن دامىتۋ پەرسپەكتيۆاسىن تالقىلادى. سونداي-اق پرەزيدەنتتەر ايماقتىق جانە حالىقارالىق ماسەلەلەر تۋرالى پىكىر الماستى.

بۇعان دەيىن مەملەكەت باسشىسى قاسىم-جومارت توقايەۆ اقوردادا قازاقستانعا رەسمي ساپارمەن كەلگەن رۋاندا پرەزيدەنتى پول كاگامەنى قارسى العانىن جازعان ەدىك.