قازاقستان مەن رۋاندا اراسىندا IT سالاسىن بىرلەسىپ دامىتۋ مەموراندۋمى راسىمدەلەدى
استانا. قازاقپارات - قازاقستان مەن رۋاندا اراسىندا IT سالاسىن بىرلەسىپ دامىتۋ مەموراندۋمى راسىمدەلەدى. بۇل تۋرالى اقوردادا سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ ايتتى.
- بىرىنشىدەن، رۋاندا مەملەكەتىمەن IT سالاسىن بىرگە دامىتۋ ءۇشىن مەموراندۋمعا قول قويامىز. ولار e-government پلاتفورماسىن دامىتىپ جاتىر. ەل ەلەكتروندى ۇكىمەتتى دامىتۋ بويىنشا الەمدىك رەيتينگتە 119-ورىندا بولسا، ءبىز 24-ورىندامىز. egov پلاتفورمامىزدى كورسەتىپ، ونىڭ قانداي قۇرالدارىن ەكسپورتتاۋعا بولاتىنىن تانىستىرامىز. ەكىنشىدەن، رۋاندا پرەزيدەنتى سپۋتنيك قۇراستىرۋ زاۋىتىنا بارادى. ولارعا جەردى قاشىقتان زوندتاۋ سپۋتنيكتەرىن قۇراستىرۋ، بايلانىس مۇمكىندىكتەرىن كورسەتەمىز، - دەدى مينيستر ب ا ق وكىلدەرىنە بەرگەن سۇحباتىندا.
وسى ورايدا ول وتكەن جىلى قازاقستان تاريحىندا ەڭ ءبىرىنشى سپۋتنيك ەكسپورتىنا قاتىستى كەلىسىمشارت موڭعوليامەن، ال بيىل كونگومەن راسىمدەلگەنىن اتاپ ءوتتى.
- استانا ەكونوميكالىق فورۋمى اياسىندا تاعى ءبىر ەكسپورتتىق كەلىسىمشارت جاسالادى. ونى ارتىنان جاريا ەتەمىز. رۋاندا دا سپۋتنيك ەكسپورتى بويىنشا كەلىسىمشارت جاساسۋ مۇمكىندىگىن قاراستىرۋدى جوسپارلاپ وتىر، - جاسلان ماديەۆ.
بۇعان دەيىن مەملەكەت باسشىسى قاسىم-جومارت توقايەۆ اقوردادا قازاقستانعا رەسمي ساپارمەن كەلگەن رۋاندا پرەزيدەنتى پول كاگامەنى قارسى العانىن جازعان ەدىك.
