قازاقستان مەن قىتايدى جالعايتىن 3-تەمىرجول سالىنادى
استانا. KAZINFORM - قازاقستان رەسپۋبليكاسى پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ قازاقستان مەن قىتاي اراسىنداعى ترانزيت جانە كولىك قاتىناسى سالاسىنداعى ىنتىماقتاستىقتى دامىتۋدىڭ وزەكتى تۇستارىنا توقتالدى.
«بۇگىن قول قويىلعان يننوۆاتسيالار جانە اۋىل شارۋاشىلىعى سالاسىنداعى كىشى كوميتەتتەردى قۇرۋ تۋرالى حاتتاما ەكىجاقتى جوسپارلاردىڭ ىسكە اسۋىنا ارقاۋ بولارى ءسوزسىز. وسى قۇجاتتا كوزدەلگەندەي، اۋىل شارۋاشىلىعى ونىمدەرىن شىعارۋدا جانە تەرەڭ وڭدەۋدە ءوزارا ءتيىمدى جوبالاردى جۇزەگە اسىرۋ ءۇشىن ءبىزدىڭ ۇكىمەت قىتاي بيزنەسىنە قولعابىس كورسەتۋگە ءازىر»، - دەدى مۇرات نۇرتىلەۋ قىتايدىڭ سىرتقى ىستەر مينيسترىمەن كەزدەسۋدەن كەيىن ب ا ق- قا مالىمدەمە جاساپ.
ونىڭ ايتۋىنشا، كۇردەلى گەو-ەكونوميكالىق احۋالدا ترانزيتتىك جانە كولىكتىك ىنتىماقتاستىقتى دامىتۋدىڭ وزەكتىلىگى وسۋدە.
«قىتايدىڭ «ءبىر بەلدەۋ، ءبىر جول» باستاماسى مەن ستراتەگيالىق ماڭىزعا يە بولعان ترانسكاسپي حالىقارالىق كولىك مارشرۋتى ءبىر-ءبىرىن تولىقتىرىپ، ورتاق ماقساتتاردى كوزدەيدى. وسى تۇستا، ەكى ەلدىڭ تەمىرجول مەن اۆتوكولىك بەكەتتەرىنىڭ وتكىزۋ قابىلەتتەرىن ارتتىرۋ جانە 3-تەمىرجول وتكەلىن سالۋ ماسەلەلەرىن دايەكتى تۇردە تالقىلادىق. ەكىجاقتى ساۋدا-ەكونوميكالىق جانە ينۆەستيتسيا سالاسىنداعى بارلىق قادام حالىقتارىمىزدىڭ ءال-اۋقاتىن جاقسارتۋعا باعىتتالعان»، - دەيدى م. نۇرتىلەۋ.
ايتا كەتەيىك، بۇگىن قىتاي حالىق رەسپۋبليكاسىنىڭ سىرتقى ىستەر ءمينيسترى ۆان ي قازاقستانعا رەسمي ساپارمەن كەلدى.
ساپار اياسىندا قازاقستان رەسپۋبليكاسى پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋمەن شاعىن جانە كەڭەيتىلگەن قۇرامداعى كەلىسسوزدەر ءجۇردى. سودان سوڭ ۆەدومستۆو باسشىلارى ەكىجاقتى قۇجاتتارعا قول قويدى.
قازاقستان قىتاي كومپانيالارىن سيرەك كەزدەسەتىن مينەرالداردى بىرلەسىپ يگەرۋگە شاقىرىپ وتىر.
سونداي-اق، قىتاي قازاقستانمەن جاساندى ينتەللەكت سالاسىندا ىنتىماقتاستىقتى دامىتۋعا نيەتتى.
