قازاقستان مەن قىتاي مادەني الىس-بەرىستىڭ جاڭا تاراۋىن باستادى
استانا. KAZINFORM - قىتاي مەدياكورپوراتسياسى ەلوردادا «تاتۋ كورشىلىك قارىم-قاتىناستىڭ جاڭا كەزەڭى» اتتى قىتاي-قازاقستان مادەني الماسۋ فورۋمىن وتكىزدى. وندا قىتاي مەدياكورپوراتسياسى جاساعان «شي جينپيڭنىڭ سۇيىكتى قاناتتى سوزدەرى» تەلەباعدارلاماسىنىڭ قازاق تىلىندەگى نۇسقاسى تانىستىرىلدى.
ءوز سوزىندە ق ر مادەنيەت جانە اقپارات ءمينيسترى ايدا بالايەۆا قىتايدىڭ تاتۋ كورشى عانا ەمەس، سان جىلدىق تاريحى بار ۇزاق مەرزىمدى ستراتەگيالىق ارىپتەس ەكەنىن ەرەكشە اتاپ ءوتتى.
«بۇل تاريحي بايلانىس ورتاق مۇددەگە، ءوزارا قۇرمەتكە، ەكى ەل دامۋىنىڭ داڭعىل جولىنا، بەيبىت بولاشاعىنا نەگىزدەلگەن. بيىل قازاقستان مەن قىتاي اراسىندا ديپلوماتيالىق قارىم-قاتىناستاردىڭ ورناعانىنا 32 جىل تولىپ وتىر. ءبىزدىڭ بايلانىسىمىز شىعىس حالىقتارىنا ءتان شىدامدىلىق پەن ءوزارا قۇرمەتكە جالعاسىپ، ەڭ قيىن بولىپ كورىنەتىن ماسەلەلەر مەن جاعدايلاردا ىمىراعا كەلىپ، شەشىم، تابۋ، ديالوگ جۇرگىزۋ ءداستۇرى بەرىك ورناعان»، - دەدى سپيكەر.
ونىڭ ايتۋىنشا، سوڭعى جىلدارى قازاقستان مەن قىتاي اراسىنداعى ىنتىماقتاستىق پەن ستراتەگيالىق قارىم-قاتىناس مۇلدەم جاڭا دەڭگەيگە كوتەرىلدى.
«ەكى مەملەكەت باسشىلارىنىڭ ارقاسىندا قارىم-قاتىناستار ارىپتەستىكتىڭ جوعارى دەڭگەيىنە كوتەرىلىپ، تاتۋ كورشىلىكتى ودان ءارى نىعايتۋ مەن ءوزارا ءتيىمدى ىنتىماقتاستىقتا دامىتۋعا جۇيەلى نەگىز قالاندى. ق ح ر ءتوراعاسى شي جينپيڭنىڭ قازاقستانعا قازىرگى مەملەكەتتىك ساپارى سونداي-اق پرەزيدەنت قاسىم-جومارت توقايەۆتىڭ قىتايعا جاقىندا جاساعان مەملەكەتتىك ساپارى دوستىعىمىزدى جاڭا دەڭگەيگە كوتەردى. بۇل تۋرالى ساراپشىلار قاۋىمىنىڭ عانا ەمەس، قالىڭ جۇرتشىلىقتىڭ دا شىنايى قىزىعۋشىلىعىن تۋدىرعان مەملەكەت باسشىسىنىڭ سينحۋا اقپارات اگەنتتىگىنە بەرگەن سۇبەلى سۇحباتىندا جانە ق ح ر ءتوراعاسىنىڭ قازاقپارات اگەنتتىگىنە بەرگەن باعدارلامالىق ماقالاسىندا ايتىلدى»، - دەيدى ا. بالايەۆا.
اقپارات ءمينيسترى ىنتىماقتاستىعىمىزدىڭ وتە ماڭىزدى اسپەكتىسى - مادەني سالاداعى بەرىك بايلانىس ەكەنىن جەتكىزدى.
اتاپ ايتقاندا، شىعارماشىلىق توپتاردىڭ قويىلىمدارى، مۋزەي كورمەلەرى، كوركەم ەكسپوزيتسيالار، كينويندۋسترياداعى جاڭا فيلمدەردىڭ كورسەتىلىمى، ەسكەرتكىشتەردىڭ اشىلۋىن ۇيىمداستىرۋ وتە ماڭىزدى.
ءوز كەزەگىندە قىتاي مەدياكورپوراتسياسىنىڭ باس ديرەكتورى جانە باس رەداكتورى شەن حايسيۋن 4 ساعات بۇرىن شي جينپيڭنىڭ رەسمي بورتىمەن استاناعا ۇشىپ كەلگەنىن جانە قازاقستان وتە جىلى قابىلداعانىن ايتتى.
«ارينە، ءبىز بۇل ءىس-شاراعا ەرەكشە ءمان بەرەمىز. قازاقستاننىڭ مەملەكەت باسشىسى قاسىم-جومارت توقايەۆقا العىس بىلدىرگىم كەلەدى. وسىنداي ۇلكەن اۋماقتا ءبىز شىن مانىندە وتە مەيىرىمدى ادامداردىڭ ءومىر سۇرەتىنىن كورىپ وتىرمىز. بۇگىن ءبىز قىتايدىڭ مەدياكورپوراتسياسى اتىنان سىزدەرمەن وسى فورۋمدا باس قوستىق. مەنىڭ ويىمشا، بۇل قارىم- قاتىناسىمىزدىڭ جاڭا كەزەڭىنىڭ باستاماسى بولادى. قازاقستان مەن قىتاي - تاتۋ كورشى مەملەكەتتەر. ءبىزدىڭ تاريحىمىز مىڭداعان جىلدارعا ۇلاسادى. ءبىزدىڭ اۋماقتان ۇلى جىبەك جولى ءوتتى»، - دەدى شەن حايسيۋن.
ول 2013-جىلى قىتايدىڭ ءتوراعاسى شي جينپيڭ العاش رەت «ءبىر بەلدەۋ، ءبىر جول» يدەياسىن ۇسىنعانىن ەسكە سالدى. سوڭعى 11 جىلدا قازاقستان مەن قىتاي وسى جوبا اياسىندا جۇمىس جۇرگىزۋدە.
«بۇگىن ءبىز «شي جينپيڭنىڭ سۇيىكتى قاناتتى سوزدەرى» باعدارلاماسىنىڭ ءۇشىنشى ماۋسىمىن قازاق تىلىندە باستايمىز. باعدارلاما ق ح ر ءتوراعاسىنىڭ ماڭىزدى سوزدەرىندە، ماقالالارىندا جانە اڭگىمەلەرىندە كەلتىرگەن كلاسسيكالىق قىتاي شىعارمالارىنان الىنعان دايەكسوزدەردى جيناقتاعان. بۇل حابارلار باي ءارى تەرەڭ قىتاي ءداستۇرلى مادەنيەتىنىڭ جاڭا داۋىردەگى ماعىناسىن، جاھاندىق قۇندىلىعىن اشادى. بۇل قىتايدىڭ وتكەنىن، بۇگىنىن جانە بولاشاعىن كورسەتەتىن كلاسسيكالىق سوزدەر. قىتاي بۇكىل ادامزات ءۇشىن بەيبىتشىلىك پەن وركەندەۋ سياقتى قۇندىلىقتاردى ناسيحاتتايدى. ونى قازاقستاننىڭ باستى اقپارات قۇرالدارى كورسەتەدى»، - دەدى قىتاي مەدياكورپوراتسياسىنىڭ باسشىسى.
اۆتورايجان سەرىكجان قىزى
