قازاقستان مەن قىتاي ەكىجاقتى اسكەري ىنتىماقتاستىق جوسپارىنا قول قويدى
استانا. KAZINFORM - استاناعا قىتاي حالىق رەسپۋبليكاسىنىڭ قورعانىس ءمينيسترى ادميرال دۋڭ جۋننىڭ باسشىلىعىمەن كەلگەن اسكەري دەلەگاتسيا قازاقستاننىڭ قورعانىس مينيسترلىگىندە بولدى.
ق ر قورعانىس مينيسترلىگى باسپا ءسوز قىزمەتىنىڭ حابارلاۋىنشا، گەنەرال-پولكوۆنيك رۋسلان جاقسىلىقوۆ ارىپتەسىن ق ح ر قورعانىس ءمينيسترى لاۋازىمىنا تاعايىندالۋىمەن قۇتتىقتادى.
- ءسىزدىڭ بۇل لاۋازىمداعى العاشقى ساپارىڭىز قازاقستاننان باستالۋىنىڭ وزىندىك ءمانى بار. بۇل ەكى ەل اراسىنداعى ۇلكەن سەنىم مەن دوستىق قارىم-قاتىناستىڭ بەلگىسى. وسى وقيعا قورعانىس ۆەدومستۆولارى اراسىنداعى عانا ەمەس، ەكى ەل اراسىنداعى ىنتىماقتاستىقتى نىعايتاتىنىنا سەنىمدىمىن، - دەپ اتاپ ءوتتى ول.
قازاقستاننىڭ قورعانىس ءمينيسترى ۆەدومستۆولاردىڭ بىرلەسكەن وقۋ- جاتتىعۋلار وتكىزۋگە مۇمكىندىكتەرى، سول سياقتى كادرلاردى وقىتۋ، مادەنيەت جانە سپورت سالاسىنداعى بايلانىستاردى كەڭەيتۋ تۇرعىسىنان الەۋەتى بار ەكەنىن اتاپ ءوتتى.
كەزدەسۋ بارىسىندا قازاقستان مەن قىتاي قورعانىس ۆەدومستۆولارىنىڭ باسشىلارى گەنەرال- پولكوۆنيك رۋسلان جاقسىلىقوۆ پەن ادميرال دۋڭ جۋن ەكىجاقتى قاتىناستاردىڭ قازىرگى جاي- كۇيىن جانە ولاردى دامىتۋ كوكجيەگىن تالقىلادى.
ادميرال دۋڭ جۋن سۇحباتتاسۋشىعا ريزاشىلىعىن ءبىلدىرىپ، قورعانىس ۆەدومستۆولارى اراسىنداعى ىنتىماقتاستىقتى تەرەڭدەتۋ جانە دامىتۋ نيەتىن قولدادى.
- قورعانىس مينيسترلەرى رەتىندە ەكىجاقتى قارىم-قاتىناستى نىعايتۋدا بىزگە جۇكتەلگەن ۇلكەن ميسسيا بار. مەنىڭ ساپارىم ش ى ۇ-عا مۇشە مەملەكەتتەر قورعانىس مينيسترلەرىنىڭ كەڭەسى اياسىندا ءوتىپ جاتىر. شىۇ اياسىنداعى ءوزارا قارىم-قاتىناستى نىعايتۋ - باسىم مىندەتتەردىڭ ءبىرى، - دەدى ادميرال دۋڭ جۋن.
ول شاڭحاي ىنتىماقتاستىق ۇيىمىنا ءتوراعالىق ەتۋ اياسىنداعى قازاقستاننىڭ ەلەۋلى جۇمىسىن اتاپ ءوتتى.
كەزدەسۋ سوڭىندا قورعانىس ۆەدومستۆولارى قازاقستان مەن قىتاي اراسىنداعى 2024 -جىلعا ارنالعان ەكىجاقتى اسكەري ىنتىماقتاستىق جوسپارىنا قول قويدى.
قىتاي قورعانىس ۆەدومستۆوسىنىڭ باسشىسى ادميرال دۋڭ جۋن ق ر قورعانىس مينيسترلىگىنىڭ قۇرمەتتى قوناقتارى كىتابىنا قولتاڭبا قالدىردى.
