قازاقستان مەن قىتاي دارىگەرلەرى مەديتسينادا جاساندى ينتەللەكت قولدانىلۋىن تالقىلادى
الماتى. KAZINFORM - قىتايدىڭ شينجاڭ مەديتسينالىق ۋنيۆەرسيتەتىنىڭ 6-اۋرۋحاناسى مەن جيلين ۋنيۆەرسيتەتىنىڭ 2-اۋرۋحاناسىنىڭ ورتوپەد- تراۆماتولوگ- دارىگەرلەرىنىڭ دەلەگاتسياسى تاجىريبە الماسۋ ماقساتىندا الماتى №4-قالالىق كلينيكالىق اۋرۋحاناسىندا بولدى.
ەكى ەل اراسىندا دەنساۋلىق ساقتاۋ سالاسىنداعى ىنتىماقتاستىقتى تەرەڭدەتۋ ماقساتىندا ورتوپەديا سالاسىندا 10 ماماننان تۇراتىن قىتاي دەلەگاتسياسى اكادەميالىق الماسۋ فورماتىندا پانەلدىك سەسسيالار وتكىزدى. عىلىمي تالداۋ الماتى №4-قالالىق كلينيكالىق اۋرۋحاناسى بازاسىندا ءوتتى.
«470 توسەك- ورىنعا ەسەپتەلگەن اۋرۋحانا تراۆماتولوگيا جانە ورتوپەديا ايماقتىق ورتالىعىن دامىتۋعا بەت بۇردى. ورتالىق قۇرامىنا تراۆماتولوگيالىق كومەكتىڭ تولىق تسيكلى بويىنشا 11 مامانداندىرىلعان قۇرىلىمدىق بولىمشە كىرەدى. جاساندى ينتەللەكتىنىڭ مەديتسيناعا ەنگىزىلۋى ۇلكەن بۋىندى اۋىستىرۋدا روبوت كومەگىمەن جاسالاتىن وتانى جاساۋ ارقىلى ۇلكەن سەرپىلىس بولدى. №4-قالالىق كلينيكالىق اۋرۋحانا بۇل تاجىريبەنى قازاقستاندا ءبىرىنشى بولىپ قولداندى»، - دەدى №4-قالالىق كلينيكالىق اۋرۋحانانىڭ ديرەكتورى ءبىرجان دوسمايىلوۆ.
وتاندىق تراۆماتولوگيا ءۇشىن سۇيەك اقاۋىن قالپىنا كەلتىرۋ ءۇشىن 3D فورماتىندا باسىپ شىعارىلعان تيتان قورىتپاسىنان جاسالعان يمپلانتتى زەرتتەۋ جانە كلينيكالىق قولدانۋ وزەكتى بولادى. بۇل الماتى مەن قىتاي تراۆماتولوگتارى اراسىنداعى اكادەميالىق ىنتىماقتاستىقتى دامىتۋداعى نەگىزگى ماسەلەنىڭ بىرىنە اينالدى.
قىتايدان كەلگەن دارىگەرلەردىڭ ساپارى تراۆماتولوگياداعى مەديتسينالىق قىزمەتتىڭ ساپاسىن ارتتىرۋ، تاجىريبە الماسۋ جانە مەديتسينا قىزمەتكەرلەرىنىڭ بىلىكتىلىگىن ارتتىرۋ ماقساتىندا ۇيىمداستىرىلدى. الماتى مەن قىتايداعى كلينيكالاردىڭ باسشىلىعى اكادەميالىق جانە پراكتيكالىق تاجىريبە الماسۋ ماقساتىندا ۇزاق مەرزىمدى تۇراقتى قارىم-قاتىناس ورناتۋعا كەلىستى.
اۆتور
دوسبول اتاجان
