قازاقستان مەن قىتاي بيزنەسى 5,2 ميلليارد دوللار سوماسىنداعى قۇجاتتارعا قول قويادى
استانا. KAINFORM – ق ر سىرتقى ىستەر مينيسترلىگى ينۆەستيتسيا كوميتەتىنىڭ ءتوراعاسى عابيدوللا وسپانقۇلوۆ قازاقستان مەن قىتاي اراسىنداعى جوبالارعا تۇسىنىك بەردى.
«قازاقستان مەن قىتاي اراسىنداعى ينۆەستيتسيالىق جانە ەكونوميكالىق قارىم-قاتىناس جىل سايىن ءوسىپ كەلەدى. بىلتىر 1,2 ميلليارد ا ق ش دوللارى سوماسىندا ينۆەستيتسيا تارتىلدى. جالپى، كەيىنگى 10 جىلدا 14 ميلليارد دوللار ينۆەستيتسيا قىتايدان كەلدى. سونىمەن قاتار، قىتايعا قازاقستاننىڭ تارۋارلارىن ەكسپورتتاۋ ءوسىپ جاتىر. بۇگىنگى فورۋم اياسىندا 45 تەن استام ەكونوميكالىق قۇجاتقا قول قويىلادى. ونىڭ قۇنى 5,2 ميلليارد ا ق ش دوللارىن قۇرايدى»، - دەدى ع. وسپانقۇلوۆ قازاقستان-قىتاي ىسكەرلىك كەڭەسى كەزىندە تىلشىلەر سۇراعىنا جاۋاپ بەرە وتىرىپ.
بۇل تۇرعىدا ول جۇزەگە اسىرىلاتىن ءىرى جوباعا توقتالدى.
«بىزدە ترانسكاسپي حالىقارالىق ءدالىزى ىسكە قوسىلعانىن بىلەسىزدەر. شياندا ءبىزدىڭ قۇرعاق پورتىمىز بار. بۇگىنگى قول قويىلاتىن قۇجات اياسىندا ليانيۋنگاندا «قازاقستان تەمىر جولىنىڭ» ۇلكەن جوباسىنا قول قويىلماق. ونىڭ ناتيجەسىندە تاۋار تاسىمالى بىردەن ۇلعايادى. بۇل ءوز كەزەگىندە ەۋروپا مەن قىتاي اراسىنداعى تۇرعان قازاقستان ءۇشىن ۇلكەن مۇمكىندىك. قىتاي نارىعىن ءبىز ءتيىمدى پايدالانۋىمىز كەرەك. لوگيستيكالىق جوبالاردان بولەك، مەديتسينالىق زاتتاردى شىعاراتىن سالاعا ءمان بەرىلگەن»، - دەدى ينۆەستيتسيا كوميتەتىنىڭ ءتوراعاسى.
