قازاقستان مەن قىتاي باسشىلارى ترانسكاسپي ءدالىزى ارقىلى قىتاي- قازاقستان- ەۋروپا باعىتىنداعى العاشقى كولىك كەرۋەنىن اتتاندىردى

  استانا. KAZINFORM - بۇگىن اقوردادا مەملەكەت باسشىسى قاسىم-جومارت توقايەۆ پەن قىتاي حالىق رەسپۋبليكاسىنىڭ ءتوراعاسى شي جينپيڭ ترانسكاسپي ءدالىزى ارقىلى قىتاي- قازاقستان- ەۋروپا باعىتىنداعى العاشقى كولىك كەرۋەنىن سالتاناتتى تۇردە اتتاندىردى.

كولىك كەرۋەنىنىڭ ساپارى 10 كۇندى قۇرايدى، ۇزىندىعى - 4800 شاقىرىم. كەرۋەن قازاقستاننىڭ 8 وڭىرىنەن ءوتىپ، بۇگىن قۇرىق پورتىنا جەتتى. بۇل باعىت قىتاي مەن قازاقستان اراسىندا ەكونوميكالىق جانە ساۋدا ىنتىماقتاستىقتى ودان ارى دامىتا تۇسەدى.

«قىتاي ەلىنەن شىققان جۇك اۆتوكولىك كەرۋەنى مەن كونتەينەر پويىزى اقتاۋ مەن قۇرىق پورتتارىنا كەلىپ جەتتى. ولار ازەربايجان، گرۋزيا، تۇركيا جانە ەۋروپا ەلدەرىنە بەت الۋدا. بۇل ۇلى جىبەك جولىنىڭ قايتا جاڭعىرۋى. كەرۋەن اتتانۋعا دايىن»، - دەدى قۇرىق پورتىنان تىكەلەي بايلانىسقا شىققان كولىك كوميتەتىنىڭ ءتوراعاسى التاي ءالى.

سونىمەن قاتار ەكى ەلدىڭ باسشىلارىنان كەمەلەردىڭ جۇزۋگە رۇقسات بەرۋدى سۇرادى. مەملەكەت باسشىلارى رۇقسات بەردى.

سونداي-اق قاسىم-جومارت توقايەۆ پەن شي جينپيڭ قازاقستاننىڭ بەيجىڭ قالاسىندا، قىتاي حالىق رەسپۋبليكاسىنىڭ استانا قالاسىنداعى مادەني ورتالىقتارىنىڭ، استانا قالاسىندا بەيجىڭ ءتىل جانە مادەنيەت ۋنيۆەرسيتەتتەرىنىڭ اشىلۋىنا دا رۇقسات بەردى.