قازاقستان مەن قىتاي اراسىنداعى ساۋدا بايلانىسى جاڭا قارقىن الادى

استانا. KAZINFORM - استانادا «قازاقستان مەن قىتاي اراسىنداعى ساۋدا قاتىناستارىن دامىتۋداعى جاڭا تاسىلدەر» تاقىرىبىندا ەكسپورتتاۋشىلاردىڭ فورۋمى ءوتىپ جاتىر. ءىس-شاراعا قىتايدىڭ سىچۋان جانە حۋبي پروۆينسياسىنان 120 دان استام بيزنەس وكىلى قاتىسۋدا.

ق ر ساۋدا جانە ينتەگراتسيا ءمينيسترى ارمان شاققاليەۆ ءوز سوزىندە ەكى ەل پرەزيدەنتى ءوزارا تاۋار اينالىمىن 40 ميلليارد ا ق ش دوللارىنا دەيىن ۇلعايتۋ جونىندە قىسقا مەرزىمدى مىندەت قويعانىن اتاپ ءوتتى. بۇل رەتتە، وتكەن جىلدىڭ قورىتىندىسى بويىنشا قازاقستاننىڭ ساۋدا سەرىكتەستەرىنىڭ اراسىندا قىتاي حالىق رەسپۋبليكاسى ءبىرىنشى ورىنعا شىققان.

«2023 -جىلى قازاقستان مەن قىتاي حالىق رەسپۋبليكاسى اراسىنداعى ءوزارا ساۋدا كولەمى 31,5 ميلليارد ا ق ش دوللارىن قۇرايتىن رەكوردتىق كورسەتكىشكە جەتتى. قازاقستاندىق ءونىمنىڭ قىتايعا ەكسپورتى 12,6 پايىزعا ءوسىپ، 14,7 ميلليارد دوللاردى قۇرادى. يمپورت 50,5 پايىزعا ءوسىپ، 16,8 ميلليارد ا ق ش دوللارعا جەتتى. قىتايمەن ءوزارا بايلانىس الەمدەگى قازاقستان ءۇشىن تۇراقتى پروگرەسس پەن ساۋدا-ينۆەستيتسيالىق الەۋەتتى ىسكە اسىرۋدىڭ ۇزاق مەرزىمدى فاكتورى بولىپ وتىر»، - دەدى ا. شاققاليەۆ.

بەلگىلى بولعانداي، بىلتىر قىتاي نارىعىنا ەركىن ەكسپورتتالاتىن قازاقستاننىڭ اگروونىمدەر تىزبەسى كەڭەيتىلگەن.

«ءبىز بەلسەندى جۇمىستى قىتايدىڭ ەڭ ءىرى ءۇش پروۆينتسياسىنىڭ قۇرامىنا كىرەتىن سىچۋان پروۆينسياسىنان باستادىق. بۇگىندە قازاقستان مەن پروۆينتسيا اراسىنداعى ساۋدا شامامەن 230 ميلليون دوللاردى قۇرايدى. ونىڭ ىشىندە قازاقستان 45 ميلليون دوللارعا ءونىم ەكسپورتتايدى. قىرىقتان استام قازاقستاندىق كومپانيالاردىڭ قاتىسۋىمەن وتكەن ساۋدا ميسسياسى قىتاي نارىعىنا سۇرانىس پەن قازاقستاندىق ءونىمنىڭ ەكسپورتتىق الەۋەتىنىڭ اۋقىمىن كورسەتتى. اتالعان پروۆينتسيا وتاندىق ماي ونىمدەرىنىڭ، استىق ونىمدەرىنىڭ، سۋسىنداردىڭ، كونديتەرلىك ونىمدەردىڭ جانە تاعى دا باسقا تاۋارلاردىڭ ۇلكەن كولەمىن ساتىپ الۋعا دايىن»، - دەدى مينيستر.