قازاقستان مەن قىتاي اراسىندا ترانسشەكارالىق وزەندەردە سۋ ءبولۋ كەلىسىمى جاسالماق

өзен
فوتو: Kazinform

استانا. KAZINORM - قازاقستان مەن قىتاي اراسىندا ترانسشەكارالىق وزەندەردە سۋ ءبولۋ كەلىسىمى جاسالماق. بۇل تۋرالى بۇگىن ۇكىمەت وتىرىسىندا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ايتتى.

«تۇجىرىمدامادا مەملەكەتارالىق سۋ قاتىناستارىن دامىتۋ ءۇشىن قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى ترانسشەكارالىق سۋ وبەكتىلەرىن بىرلەسىپ باسقارۋ جانە پايدالانۋ تۋرالى، سونداي-اق قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى ترانسشەكارالىق وزەندەردە سۋ ءبولۋ تۋرالى كەلىسىمدەرگە قول قويۋ كوزدەلگەن. حالىقارالىق سۋ ىنتىماقتاستىعىنىڭ ماڭىزدى قۇرامداس بولىگى - ورتالىق ازيانىڭ سۋ- ەنەرگەتيكالىق ىنتىماقتاستىعى تەتىگىن ازىرلەۋ»، - دەدى مينيستر.

ونىڭ اتاپ وتۋىنشە، ترانسشەكارالىق سۋ وبەكتىلەرىن پايدالانۋ جانە قورعاۋ جونىندەگى كەلىسسوزدەر توبى مۇشەلەرىنىڭ قۇزىرەتىن كۇشەيتۋ، سونداي-اق ارنايى دەپارتامەنت قۇرۋ جوسپارلانعان.

«ايتا كەتۋ كەرەك، «حالىقارالىق سۋ اعىندارىن كەمە قاتىناسىنان باسقاشا پايدالانۋ تۇرلەرىنىڭ قۇقىعى تۋرالى كونۆەنتسيانى راتيفيكاتسيالاۋ تۋرالى» زاڭىنىڭ جوباسى ماجىلىستە قارالىپ، سەنات قاراۋىنا ەنگىزىلدى. كونۆەنسيا ترانسشەكارالىق وزەندەر مەن كولدەردى جانە ولارمەن بايلانىستى جەراستى سۋلارىن بۇكىل الەمدە تەڭ قۇقىقتى جانە تۇراقتى باسقارۋعا ىقپال ەتەتىن جاھاندىق قۇقىقتىق مەحانيزم بولىپ سانالادى. قازىرگى ۋاقىتتا كونۆەنسيانىڭ قاتىسۋشىسى - 37 مەملەكەت. قازاقستانمەن كورشىلەس ەلدەردىڭ ىشىندە تەك وزبەكستان رەسپۋبليكاسى عانا كونۆەنسياعا مۇشە»، - دەدى ول.

سوڭعى جاڭالىقتار