قازاقستان مەن قىرعىزستان اراسىندا شەشىمىن تاپپاعان ەشقانداي ماسەلە بولماۋى كەرەك - پرەزيدەنت
استانا. KAZINFORM - جوعارى مەملەكەتارالىق كەڭەس قازاق- قىرعىز قارىم-قاتىناستارىنا ەرەكشە سەرپىن بەرەدى. بۇل تۋرالى اقوردادا قىرعىزستان پرەزيدەنتى سادىر جاپاروۆتىڭ ساپارىنا وراي جوعارى مەملەكەتارالىق كەڭەستىڭ وتىرىسىندا مەملەكەت باسشىسى قاسىم-جومارت توقايەۆ ايتتى.
«بۇگىن ءبىز كوپتەن كۇتكەن ماڭىزدى باسقوسۋعا جينالدىق. ەكى ەل اراسىنداعى قارىم-قاتىناستىڭ قارقىندى دامۋى وسى كەڭەستى وتكىزۋگە ىقپال ەتكەنى ءسوزسىز. وتىرىس بارىسىندا قازاق- قىرعىز ىنتىماقتاستىعىنىڭ ەڭ وزەكتى ماسەلەلەرى قارالادى. ءبىز قىرعىزستان پرەزيدەنتىمەن شاعىن قۇرامدا كەلىسسوز وتكىزدىك. قارىم-قاتىناستى كەڭەيتۋگە بەيىلدى ەكەنىمىزدى تاعى دا راستادىق. سادىر نۇرعوجو ۇلى (قىرعىزستان پرەزيدەنتى) ەكى ەل اراسىندا شەشىمىن تاپپاعان ەشقانداي ماسەلە بولماۋى كەرەكتىگىن ايتتى. مەن بۇل پىكىرمەن تولىق كەلىسەمىن»، - دەدى قاسىم-جومارت توقايەۆ.
مەملەكەت باسشىسى ۋاقىت سىناعىنان وتكەن ىقپالداستىعىمىزدىڭ كەلەشەگى زور ەكەنىنە كامىل سەنەتىنىمىن ايتتى.
«بۇل باعىتتا ءبىر كىسىدەي كۇش جۇمىلدىرۋىمىز قاجەت. وسى ورايدا جوعارى مەملەكەتارالىق كەڭەستىڭ جۇمىسى قازاق- قىرعىز قارىم-قاتىناستارىن دامىتۋعا ەرەكشە سەرپىن بەرەدى دەپ سەنەمىن. سونداي-اق بۇل قادام ارىپتەستىگىمىزدى جاڭا دەڭگەيگە كوتەرەدى دەپ ەسەپتەيمىن»، - دەدى قازاقستان پرەزيدەنتى.
اۆتور
رۋسلان عابباسوۆ
