قازاقستان مەن ۆەنەسۋەلا تۋريزم جانە سپورت سالاسىنداعى ىنتىماقتاستىقتى نىعايتادى

استانا. KAZINFORM - تۋريزم جانە سپورت ءمينيسترى ەرمەك مارجىقپايەۆ بوليۆار ۆەنەسۋەلا رەسپۋبليكاسىنىڭ ەلشىسى روسالبا لو بۋە انتيكومەن كەزدەستى.

كەزدەسۋدە تاراپتار تۋريزم جانە سپورت سالاسىنداعى ەكىجاقتى ىنتىماقتاستىقتى دامىتۋ پەرسپەكتيۆالارىن تالقىلادى. ۆەدومستۆو باسشىسى ۆەنەسۋەلالىقتاردى وتكەن تاۋەلسىزدىك كۇنىمەن قۇتتىقتاپ، ەلىنىڭ ودان ءارى وركەندەۋىن تىلەدى.

«ەلدەرىمىزدىڭ تۋريستىك الەۋەتى وتە زور. دەگەنمەن، تۋريستىك اعىن كورسەتكىشتەرى ايتارلىقتاي تومەن دەڭگەيدە ەكەنىن بايقاپ وتىرمىز. ستاتيستيكا دەرەكتەرى بويىنشا 2023-جىلى قازاقستانعا 243 ۆەنەسۋەلالىق تۋريست كەلسە، قازاقستان ازاماتتارى ۆەنەسۋەلاعا ساپارلاماعان»، - دەپ اتاپ ءوتتى ەرمەك مارجىقپايەۆ.

مينيستر بۇل جاعداي تىكەلەي رەيستەردىڭ بولماۋىنا جانە ۆيزالىق قيىندىقتارعا بايلانىستى ەكەنىن اتاپ ءوتتى.

«تۋريستىك اعىندى ۇلعايتۋ جانە ىنتىماقتاستىقتى ودان ءارى دامىتۋ ءۇشىن وسى ماسەلەلەردى مۇقيات پىسىقتاۋ قاجەت»، - دەدى ە. مارجىقپايەۆ.

سونداي-اق مينيستر پاريجدە وتەتىن وليمپيادادا شەتەلدىك سپورتشىلارعا جاقسى ناتيجە كورسەتۋىنە تىلەكتەس ەكەنىن جەتكىزدى. ءوز كەزەگىندە ەلشى حانىم سپورت جانە تۋريزم سالالارىندا ىنتىماقتاستىقتى نىعايتۋعا ىقپال ەتەتىن ءبىرقاتار باستاما مەن جوبالاردى ايتتى. ءوزارا ءىس-قيمىلدىڭ ناقتى باعىتتارى كورسەتىلەتىن سالالىق ۆەدومستۆولار اراسىنداعى ەكىجاقتى قۇجاتتارعا قول قويۋدى ۇسىندى.

كەزدەسۋ بارىسىندا ەرمەك مارجىقپايەۆ ەلشىدەن ۆەنەسۋەلا سپورتشىلارىن 8-13-قىركۇيەك ارالىعىندا ەلوردادا وتەتىن 5-دۇنيەجۇزىلىك كوشپەندىلەر ويىندارىنا قاتىسۋعا قولعابىس ەتۋىن سۇرادى.

كەزدەسۋ سوڭىندا ەرمەك مارجىقپايەۆ ۆەنەسۋەلانىڭ تۋريستىك كومپانيا وكىلدەرىن 2025-جىلى قازاقستاندا وتەتىن «تۋريزم جانە ساياحات» حالىقارالىق كورمەسىنە قاتىسۋعا شاقىردى.

اۆتور كۇنسۇلتان وتارباي