قازاقستان مەن مىسىر اراسىندا اۋە رەيستەرى ارتادى

استانا. KAZINFORM - استانا قالاسىندا قازاقستان رەسپۋبليكاسى مەن مىسىر اراب رەسپۋبليكاسىنىڭ اۆياتسيالىق بيلىگى اراسىندا ەكىجاقتى كەلىسسوز ءوتتى.

قازاقستاندىق دەلەگاتسيانى قازاقستان رەسپۋبليكاسى كولىك مينيسترلىگىنىڭ ازاماتتىق اۆياتسيا كوميتەتىنىڭ ءتوراعاسى سالتانات تومپيەۆا، مىسىر تاراپىن مىسىر اۆياتسيا مينيسترلىگى اۆياتسيالىق اكىمشىلىگىنىڭ اۋە كولىگى جونىندەگى مەملەكەتتىك حاتشىسىنىڭ ورىنباسارى حەشام ابدەل باسەت مىرزا باسقاردى.

كەلىسسوز قورىتىندىسى بويىنشا تاراپتار ەلدەر اراسىنداعى رۇقسات ەتىلگەن رەيستەردىڭ جالپى سانىن اپتاسىنا 14 تەن 48 گە دەيىن، سونداي- اق ءاربىر تاراپ ءۇشىن رۇقسات ەتىلگەن تارماقتاردى 2 دەن 3 كە دەيىن ۇلعايتۋعا ۋاعدالاستى.

سونداي- اق، تاعايىندالعان تاسىمالداۋشىلاردىڭ سانى ارتتى.

ماسەلەن، قازاقستاندىق تاراپ قولدانىستاعى Air Astana جانە SCAT تاسىمالداۋشىلارىنا Fly Arystan اۋە كومپانياسىن ەلدەر اراسىنداعى تۇراقتى رەيستەردى ورىنداۋعا تاعايىندادى.

مىسىر تاراپى ءوز كەزەگىندە قولدانىستاعى EgyptAir، EgyprAir Cargo جانە Air Cairo تاسىمالداۋشىلارىنا Red Sea جانە Nile Air تاعايىندادى.

سونىمەن بىرگە، قول جەتكىزىلگەن كەلىسىم بويىنشا ەكى ەلدىڭ اۋە كومپانيالارى ءوزارا كوممەرتسيالىق كەلىسىمدەر جاساي الادى.

ۋاعدالاستىق نەگىزىندە ەكى تاراپتىڭ تاعايىندالعان اۋە كومپانيالارى رەيستەر سانىن ۇلعايتۋدى جانە ەلدەر اراسىنداعى ۇشۋ گەوگرافياسىن كەڭەيتۋدى جوسپارلاپ وتىر.