قازاقستان مەن موڭعوليانىڭ كونستيتۋتسيالىق سوتتارى ءوزارا تۇسىنىستىك تۋرالى مەموراندۋم قابىلدادى
استانا. KAZINFORM -ازيانىڭ كونستيتۋتسيالىق سوتتارى مەن تەڭەستىرىلگەن ينستيتۋتتارى قاۋىمداستىعىنىڭ VI كونگرەسى اياسىندا قازاقستان مەن موڭعوليانىڭ كونستيتۋتسيالىق سوتتارى ءوزارا تۇسىنىستىك تۋرالى مەموراندۋم قابىلدادى.
بۇل تۋرالى ق ر كونستيتۋتسيالىق سوتىنىڭ باسپا ءسوز قىزمەتى ءمالىم ەتتى.
«قازاقستان مەن موڭعوليا ۇزاق جىلدار بويى تىعىز ىنتىماقتاستىقتى قولداپ، ەكىجاقتى قارىم-قاتىناستى ستراتەگيالىق ارىپتەستىك دەڭگەيىندە ساقتاپ كەلەدى. كونستيتۋتسيالىق باقىلاۋ ورگاندارىنىڭ ىنتىماقتاستىعى كوپتەگەن وزەكتى جانە ۇقساس كونستيتۋتسيالىق- قۇقىقتىق ماسەلەلەرمەن تانىسۋعا ىقپال ەتەدى جانە قازىرگى زامانعى قۇقىقتىق ۇردىستەردى ەسكەرە وتىرىپ، قۇقىقتىق ۇستانىمداردى قالىپتاستىرۋعا مۇمكىندىك بەرەدى»، - دەلىنگەن اقپاراتتا.
ق ر كونستيتۋتسيالىق سوتىنىڭ ءتوراعاسى ەلۆيرا ازيموۆا مەموراندۋمعا قول قويۋ قۇقىقتىق مەملەكەتتىلىكتى، كونستيتۋتسيالىق سوت تورەلىگى، قۇقىق ۇستەمدىگى جانە قازاقستان مەن موڭعولياداعى نەگىزگى قۇقىقتاردى قورعاۋ قاعيداتتارىن ۇستانۋ جولىنداعى ەكىجاقتى ىنتىماقتاستىقتى جانداندىرۋ جانە كەڭەيتۋ جولىنداعى ماڭىزدى قادام ەكەنىن اتاپ ءوتتى.
