قازاقستان مەن موڭعوليا اراسىنداعى ىنتىماقتاستىقتى نىعايتۋعا مۇددەلىمىز - ماۋلەن اشىمبايەۆ

استانا. KAZINFORM - سەنات ءتوراعاسى ماۋلەن اشىمبايەۆ موڭعوليانىڭ قازاقستانداعى ەلشىسى دورج بايارحۋۋمەن كەزدەستى. سۇحبات بارىسىندا تاراپتار پارلامەنتارالىق ىنتىماقتاستىقتى ودان ءارى نىعايتۋ جانە ەكى ەل اراسىنداعى سەرىكتەستىكتى كەڭەيتۋ ماسەلەلەرىن تالقىلادى.

بۇل تۋرالى سەناتتىڭ باسپا ءسوز قىزمەتى ءمالىم ەتتى.

پالاتا سپيكەرى ەلشىگە ءىلتيپات بىلدىرە كەلىپ، جوعارى دەڭگەيدەگى ءوزارا سەنىمگە نەگىزدەلگەن ديالوگ قازاقستان مەن موڭعوليا ىنتىماقتاستىعىن ءارى قاراي نىعايتۋدىڭ نەگىزگى كەپىلى ەكەنىن اتاپ ءوتتى.

وسىعان بايلانىستى ول قازىرگى تاڭدا حالىقارالىق ۇيىمدار اياسىندا بەلسەندى دامىپ كەلە جاتقان ەكى ەلدىڭ پارلامەنتارالىق قارىم-قاتىناسىن ارتتىرۋدىڭ ماڭىزى زور ەكەنىنە نازار اۋداردى.

«قازاقستان مەن موڭعوليا بايلانىسىنىڭ ماڭىزدى باعىتتارىنىڭ ءبىرى - پارلامەنتارالىق ديالوگ. ءبىز الداعى ۋاقىتتا موڭعوليا مەملەكەتتىك ۇلى حۋرالىمەن ىنتىماقتاستىقتى ودان ءارى نىعايتۋعا مۇددەلىمىز. قازاقستان پارلامەنتىنىڭ سەناتىندا موڭعوليا پارلامەنتىمەن ىنتىماقتاستىق جونىندەگى توپ قۇرىلدى. مەملەكەتتىك ۇلى حۋرالدا دا «موڭعوليا- قازاقستان» دەپ اتالاتىن پارلامەنتتىك دوستىق توبى جۇمىس ىستەيدى. الداعى ۋاقىتتا وسى باعىتتاعى بەلسەندى بايلانىس پارلامەنتتەر اراسىنداعى قارىم-قاتىناستى ارتتىرۋعا مۇمكىندىك بەرەدى جانە زاڭ شىعارۋ قىزمەتىندە تاجىريبە الماسۋعا جول اشادى»، - دەدى ماۋلەن اشىمبايەۆ.

سونىمەن قاتار سەنات ءتوراعاسى ەكى ەل اراسىندا ءتۇرلى سالاداعى بايلانىستار ءتيىمدى دامىپ كەلە جاتقانىن تىلگە تيەك ەتتى. كەزدەسۋدە ساۋدا-ەكونوميكالىق، ينۆەستيتسيالىق ىنتىماقتاستىق ماسەلەلەرى دە تالقىلاندى.

ماۋلەن اشىمبايەۆ ءوز سوزىندە مەملەكەت باسشىسى قاسىم-جومارت توقايەۆتىڭ باستاماسىمەن قازاقستاندا ىسكە اسىرىلعان اۋقىمدى ساياسي جاڭعىرتۋلاردىڭ ناتيجەلەرىنە توقتالىپ ءوتتى.

كەزدەسۋ بارىسىندا پالاتا سپيكەرى رۋحاني ديپلوماتيانى دامىتۋدىڭ ماڭىزى جونىندە دە ءسوز قوزعادى. سونداي- اق ول موڭعول ءدىن كوشباسشىلارى الەمدىك جانە ءداستۇرلى دىندەر ليدەرلەرى سەزىنىڭ ماقساتتارىنا قول جەتكىزۋگە ەلەۋلى ۇلەس قوسىپ، بەلسەندى قولداۋ كورسەتىپ كەلە جاتقانىن ايتىپ، سول ءۇشىن دورج بايارحۋۋگە العىس ءبىلدىردى. وسى رەتتە موڭعوليا بۋدديستىك حرامدارىنىڭ باسشىلارى فورۋمنىڭ مازمۇنىن ارتتىرۋعا جانە سەزدىڭ قورىتىندى قۇجاتتارىن دايىنداۋعا ايتارلىقتاي ۇلەس قوسقانىن اتاپ وتكەن ءجون.

ءوز كەزەگىندە ەلشى ءبىزدىڭ ەلدە جۇرگىزىلىپ جاتقان قوعامدىق-ساياسي جاڭعىرتۋلاردى جوعارى باعالاپ، قازاقستان مەن موڭعوليا اراسىنداعى ىنتىماقتاستىقتى ودان ءارى نىعايتۋعا مۇددەلى ەكەنىن جەتكىزدى.