قازاقستان مەن مالتا قاي سالالاردا ىنتىماقتاستىقتى ارتتىرادى

Мальта
Фото: Виктор Федюнин/Kazinform

استانا. KAZINFORM - ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ءىس باسىنداعى ءتوراعاسى - مالتانىڭ سىرتقى، ەۋروپالىق ىستەر جانە ساۋدا ءمينيسترى يەن بورچ العاش رەت قازاقستانعا رەسمي ساپارمەن كەلدى. ساپار اياسىندا ول ق ر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋمەن كەلىسسوز جۇرگىزدى.

«ءبىزدىڭ ەلىمىز ەلەۋلى دەموكراتيالىق جەتىستىكتەرگە جەتىپ، ادىلەتتى قازاقستاندى قۇرۋدىڭ سارالى جولىندا. بۇگىنگى ساپاردى پرەزيدەنت ق. توقايەۆ باستاعان ىرگەلى ساياسي، الەۋمەتتىك جانە ەكونوميكالىق رەفورمالاردى قولداۋىنىڭ جارقىن بەلگىسى دەپ سانايمىز. تۇعىرى بەكەم، ەكونوميكاسى قۋاتتى، حالىقارالىق ساحناداعى بەدەلى كەڭىنەن مويىندالعان مالتا ەۋروپالىق وداقتاعى قازاقستاننىڭ ماڭىزدى ءارى سەنىمدى سەرىكتەسى. وسىدان 31 جىل بۇرىن ەلدەرىمىز اراسىندا ديپلوماتيالىق قاتىناس ورناتىلدى. سوڭعى كەزدە استانا مەن ۆاللەتتانىڭ ساياسي ديالوگى ەكپىندى تۇردە دامىپ كەلەدى»، - دەدى مۇرات نۇرتىلەۋوۆ كەزدەسۋ قورىتىندىسى بويىنشا وتكەن بريفينگتە.

قازاقستاندىق مينيستر ەكى ەلدىڭ ەكونوميكالىق جانە مادەني-گۋمانيتارلىق ىنتىماقتاستىعىنىڭ دا بولاشاعى زور ەكەنىن اتاپ ءوتتى. وتكەن جىلدارى قازاقستان-مالتا تاۋار اينالىمى 250 ميلليون دوللار بولعان.

«ساۋدا-ەكونوميكالىق الەۋەتىمىزدى تولىق پايدالانۋ ماقساتىندا، مينيستر بورچپەن تۋريزم، وڭدەۋ، جەر قويناۋىن بارلاۋ، تەڭىز لوگيستيكاسى سياقتى پەرسپەكتيۆالى سەكتورلار بويىنشا جۇمىستى جانداندىرۋدى ۋاعدالاستىق. قازاقستان ازاماتتارى ءۇشىن ەۋروپالىق وداقتىڭ ۆيزالىق رەجيمىن جەڭىلدەتۋ ماسەلەسىنە بولەك توقتالدىق. ءبىزدىڭ ويىمىزشا، ونىڭ وڭ شەشىلۋى سان قىرلى بالانىستاردىڭ بەلسەندى دامۋىنا زور سەپتىگىن تيگىزەر ەدى»، - دەيدى م. نۇرتىلەۋ.

Мальта
Фото: Виктор Федюнин/Kazinform

سونىمەن بىرگە، تاراپتار وڭىرلىك جانە جاھاندىق كۇن تارتىبىندەگى وزەكتى تاقىرىپتار بويىنشا پىكىر الماسقان.

«جالپى، كوپتەگەن حالىقارالىق ماسەلەلەر بويىنشا ەلدەرىمىزدىڭ ۇستانىمدارى جاقىن نەمەسە ۇقساس. بيىل ەلىمىزدىڭ ءبىرقاتار ءىرى حالىقارالىق ۇيىمدارعا ءتوراعالىعى بارىسىن ورتاعا سالدىق. حەلسينكي قورىتىندى اكتىسى قابىلدانعانىنا 50 جىلدىعى قارساڭىندا، ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ءرولى مەن بەدەلىن ارتتىرۋ جولدارىن قاراستىردىق»، - دەدى ق ر سىرتقى ىستەر ءمينيسترى.

سوڭعى جاڭالىقتار