قازاقستان مەن ۇلى بريتانيا پايدالى قازبالاردى بىرلەسىپ وندىرمەك
قازاقستانداعى سيرەك كەزدەسەتىن جەر ەلەمەنتتەرىن يگەرۋ ءۇشىن بريتان تەحنولوگيالارى تارتىلاتىن بولادى.
لوندوندا ماڭىزدى مينەرالدار سالاسىندا ىنتىماقتاستىقتى نىعايتۋ جونىندەگى جول كارتاسىنا قول قويىلدى. الداعى ۋاقىتتا قازاقستان ۇلى بريتانيامەن بىرلەسىپ، گەولوگيالىق بارلاۋ، پايدالى قازبالاردى ءوندىرۋ جانە وڭدەۋ جۇمىستارىن جۇرگىزبەك، دەپ حابارلايدى Kazinform نىڭ وسى ەلدەگى مەنشىكتى ءتىلشىسى عالىمجان قارامان ۇلى.
مەملەكەت باسشىسى قازاقستاننىڭ سيرەك جەر مەتالدارىن «جاڭا مۇناي» دەپ اتاپ، ولاردى يگەرۋدى ۇكىمەتكە تاپسىرعان بولاتىن. ماڭىزدى مىندەتتى جۇزەگە اسىرۋ ءۇشىن جاڭا تەحنولوگيالار قاجەت. وسى ماقساتپەن لوندونعا قازاقستان رەسپۋبليكاسىنىڭ ونەركاسىپ جانە قۇرىلىس ۆيتسە-ءمينيسترى كەلىپ، ۇلى بريتانيانىڭ بيزنەس جانە ساۋدا ىستەرى جونىندەگى مەملەكەتتىك مينيسترىمەن كەزدەستى.
«قازاقستان بويىنشا ايتساق قازىر بىزدە سيرەك جەر ەلەمەنتتەرى وتە كوپ. 18 ەلەمەتىمىز بار. ونىڭ ىشىندە سەگىزىن وڭدەۋ ماسەلەسىن پىسىقتادىق. قازىر جۇمىس ىستەلۋدە. تاعى 10 ەلەمەنتىمىز بار. تەحنولوگيالار جوق، ءبىراق پايدالى قازبالار بار. ول ءۇشىن تەحنولوگيالار كەرەك»، - دەيدى ق ر ونەركاسىپ جانە قۇرىلىس ۆيتسە- ءمينيسترى شارحان يران.
ءبىر جىل بۇرىن ۇلى بريتانيانىڭ سىرتقى ىستەر ءمينيسترى دجەيمس كليەۆەرلي قازاقستانعا ءىس ساپارمەن كەلىپ، ماڭىزدى مينەرالدار سالاسىنداعى ىنتىماقتاستىق تۋرالى مەموراندۋمعا قول قويعانى بەلگىلى. بۇگىنگى جول كارتاسى سول كەلىسىمنىڭ زاڭدى جالعاسى.
«جول كارتاسىندا قاي سالادا سەرىكتەستىك ورناتىلاتىنى ناقتى جازىلعان. بۇل جەردە ماسەلە ءوزارا ءتيىمدى ىنتىماقتاستىق تۋرالى ەكەنىن ءتۇسىنۋ كەرەك. بريتانيالىقتار رەسۋرستىق بازامىزعا قول جەتكىزۋگە مۇددەلى بولسا، ءبىزدىڭ ۇكىمەت ولاردىڭ تەحنولوگيالارىنىڭ ترانسفەرتى تۋرالى ناقتى تالاپتار قويىپ جاتىر»، - دەيدى قازاقستاننىڭ ۇلى بريتانياداعى ەلشىسى ماعجان ءىلياسوۆ.
قۇجاتتا ەلىمىزگە جاڭا تەحنولوگيالار تارتۋمەن قاتار ماڭىزدى مينەرالدار تىزبەگىن دەكاربونيزاتسيالاۋ، سونداي-اق عىلىمي-زەرتتەۋ الەۋەتىمىزدى دامىتۋ ماسەلەلەرى قامتىلعان.
«بۇل ءوزارا تۇسىنىستىك تۋرالى مەموراندۋمدى ىلگەرى جىلجىتۋعا باعىتتالعان باتىل قادام. جول كارتاسىنىڭ ناتيجەسىندە قازاقستاندا بريتانيالىق كومپانيالار كوكجيەكتەرىن كەڭەيتىپ، تاجىريبەلەرىمەن بولىسەدى دەگەن زور ۇمىتتەمىز»،-دەيدى ۇلى بريتانيانىڭ ونەركاسىپ جانە ەكونوميكالىق قاۋىپسىزدىك ءمينيسترى نۋسرات گاني.
بۇگىندە بريتانيالىق Maritime House كومپانياسى قازاقستاندىق «جەزقازعانسيرەكمەتالل» كاسىپورنىمەن بىرلەسە وتىرىپ، رەنيي ەلەمەنتىن ءوندىرۋدى باستاپ كەتتى. Rolls-Royce كومپانياسىمەن سەرىكتەستىك ورناتۋ تۋرالى كەلىسسوزدەر جۇرگىزىلۋدە. سونداي-اق ەلىمىزدىڭ ۇلتتىق گەولوگيالىق قىزمەتى بريتان گەولوگيالىق بارلاۋ قىزمەتىمەن بىرلەسىپ جۇمىس ىستەۋدى جوسپارلاپ وتىر.
اۆتور
عالىمجان قارامان ۇلى
