قازاقستان مەن ازەربايجان پرەزيدەنتتەرى فيزۋلي قالاسىن دامىتۋعا ارنالعان باس جوسپارمەن تانىستى

باكۋ. KAZINFORM - قاسىم-جومارت توقايەۆ ازەربايجان رەسپۋبليكاسىنا جاساعان مەملەكەتتىك ساپارىنىڭ ەكىنشى كۇنى يلحام اليەۆپەن بىرگە فيزۋلي قالاسىنداعى قيراعان جەرلەردى ارالاپ كورىپ، شاھاردى دامىتۋعا ارنالعان باس جوسپارمەن تانىستى.

مەملەكەتتەر باسشىلارىنا قالانى جانە ونىڭ توڭىرەگىندەگى اۋماقتاردى قايتا قالپىنا كەلتىرۋ ءۇشىن قولعا الىنعان شارالار تۋرالى مالىمەت بەرىلدى. سونداي- اق شاھاردىڭ جاڭا كەلبەتى: كەلەشەك اكىمشىلىك ورتالىقتىڭ، ساياباقتىڭ جانە باسقا دا ماڭىزدى نىسانداردىڭ ەسكيزدەرى مەن جوبالارى كورسەتىلدى.

«بۇدان بولەك، ەكى ەل پرەزيدەنتتەرىنە قازىرگى ۋاقىتتا قالادا اۋقىمدى قۇرىلىس جانە قايتا قالپىنا كەلتىرۋ جۇمىستارى جۇرگىزىلىپ جاتقانى جونىندە باياندالدى. بىلتىر مامىر ايىندا قالا ىشىندەگى كوشەلەر مەن جولدار جەلىسىنىڭ نەگىزى قالانىپ، اۋىزسۋمەن قامتاماسىز ەتۋ، كارىز جانە جاۋىن سۋىنىڭ اعىپ كەتۋ جۇيەسىن تارتۋ جۇمىستارى باستالعان»، - دەلىنگەن حابارلامادا.

سونداي-اق سيفرلىق قوسالقى ستانتسيا مەن «فيزۋلي» باسقارۋ ورتالىعى ىسكە قوسىلعان. سونىمەن قاتار ءبىر مەزگىلدە اكىمشىلىك عيماراتتاردىڭ، كوممۋنالدىق ءۇي-جايلاردىڭ، تۇرعىن ءۇي كۆارتالىنىڭ قۇرىلىسى باستالعان. قازىر فيزۋليدە 38 كوپقاباتتى عيماراتتىڭ قۇرىلىسى جۇرگىزىلىپ جاتىر.

ەسكە سالا كەتەيىك، مەملەكەت باسشىسى قاسىم-جومارت توقايەۆ فيزۋلي قالاسىنا ساپارمەن بارعانىن جازعان بولاتىنبىز. ال، ەكى ەلدىڭ ءوزارا قارىم-قاتىناسى جانە قاسىم-جومارت توقايەۆتىڭ ازەربايجانعا ساپارىنان نە كۇتۋگە بولاتىنىن ءتىلشىنىڭ شولۋىنان وقي الاسىز.